Американскиот претседател Доналд Трамп повторно го засили притисокот врз украинскиот претседател Володимир Зеленски, повикувајќи го да прифати мировен договор што, според него, е „многу блиску до финализирање“. Преку објава на неговата социјална мрежа „Truth Social“, Трамп остро го критикуваше Зеленски поради неговите ставови за Крим, предупредувајќи дека со актуелниот пристап Украина ризикува да ја загуби целата земја.
Во своето обраќање, Трамп се осврна на неодамнешната изјава на Зеленски за The Wall Street Journal, каде украинскиот претседател порача: „Украина никогаш нема правно да ја признае окупацијата на Крим. За тоа нема што да се разговара.“ Трамп ја оцени оваа изјава како пречка за постигнување на договор со Русија и потсети дека, според него, Крим е изгубен „уште за време на администрацијата на Обама“.
„Крим не е тема за дискусија. Големи руски воени бази постоеле таму со децении. Никој не бара од Зеленски да го признае Крим како руски, но ако навистина сакал да го брани, зошто тоа не се случи уште пред 11 години кога Русија го презеде без испукан куршум?“, прашува Трамп.
Тој ги нарече изјавите на Зеленски „запаливи“ и директна причина за тешкотиите при постигнување на мир. Според него, Украина стои пред избор: или ќе прифати договор, или ќе продолжи со војната уште три години – со ризик да ја изгуби државноста.
„Многу сме блиску до договор. Но човекот кој ‘нема повеќе адути’ мора да го сфати тоа и да ја заврши работата. Ситуацијата е критична – се губат илјадници животи неделно без причина. Ќе сторам сѐ што можам да помогнам – и на Украина и на Русија – да излезат од овој хаос, кој никогаш немаше да се случи доколку јас останев претседател“, порача Трамп.
Американските медиуми јавуваат дека предложениот мировен план од тимот на Трамп вклучува и официјално признавање на рускиот суверенитет над анектираниот Крим. Зеленски веќе јасно и недвосмислено го отфрли овој предлог, нагласувајќи дека таквата позиција е во директна спротивност со украинскиот устав.
Притисокот од Трамп не е насочен само кон Киев. Според неговата кампања, доколку двете страни не покажат волја за договор, САД можат целосно да се повлечат од процесот на посредување. Потпретседателот Џеј Ди Ванс изјави дека „предлогот е фер“ и дека двете страни мора или да го прифатат, или САД да се откажат од улогата на медијатор.
Според него, планот би „замрзнал“ дел од териториите под постојните линии на контрола, но ќе бара и од двете страни да отстапат дел од територијата што моментално ја држат. Деталите сè уште не се целосно објавени.
