Доктори алармираат: Прскањето со масло за готвење пред сончање е рецепт за катастрофа
Иако звучи неверојатно, се уште има луѓе кои веруваат дека маслото за готвење може да биде „природно“ решение за побрзо потемнување на сонце. Експертите за нега на кожа, сепак, предупредуваат: оваа практика е исклучително опасна и може да доведе до сериозни повреди на кожата.
Причина за најновото предупредување беше видео објавено од 22-годишната Courts Ingham на TikTok, каде таа го нарекува сончогледовото масло „трик за совршен тен“. Во видеото, таа се прска со масло по нозете додека се сонча и тврди дека резултатот бил вреден.
Неколку дена подоцна, Ingham сподели фотографија со благи изгореници на кожата, но остана на ставот дека „знаела што прави“. „Ако премногу болеше, ќе го измиев“, изјави таа, несвесна за сериозноста на потенцијалната штета.
„Дерматолозите плачат“ – јавноста згрозена, докторите алармираат
Корисниците на социјалните мрежи остро реагираа. „Поради вакво нешто завршив во болница, внимавај“, напиша една следбеничка. Друг коментар гласеше: „Ова е лудост. Дерматолозите сега плачат.“
Лекарите истакнуваат дека ваквите методи потсетуваат на тренд од 1970-тите, кога луѓето користеле масло за готвење, бебешко масло или кокосово масло како замена за заштитна крема. Иако свеста за опасноста од УВ-зрачење денес е поголема, се чини дека некои трендови повторно се враќаат – на штета на здравјето.
Според д-р Софи Момнен од Cadogan Clinic, оваа постапка е „застрашувачка“. „Маслата за готвење не се за надворешна употреба, особено не на силно сонце.
Тие дејствуваат како лупа – го засилуваат дејството на УВ-зраците и го зголемуваат ризикот од сериозни изгореници, оштетување на кожата и клеточни мутации“, предупредува таа.
Нема „безбедно сончање“, велат дерматолозите
Д-р Рос Пери, медицински директор на Cosmedics Skin Clinics, потсетува дека дури и едно тешко изгорување може драстично да го зголеми ризикот од рак на кожа. „Со прскање масло за готвење на кожа директно изложена на сонце се ризикуваат не само изгореници, туку и потенцијално фатални последици, вклучувајќи и топлотен удар“, истакнува тој.
И двајцата лекари советуваат користење на крема за сончање со заштитен фактор од најмалку SPF 30, избегнување на сонце во периодот меѓу 11 и 17 часот, и игнорирање на опасни TikTok трендови.
„Ставете ја безбедноста на прво место. Користете соодветна заштита, барајте сенка и не си играјте со сопственото здравје за неколку нијанси потемен тен“, заклучува д-р Момнен.
