Свет

Срамни сцени во Ватикан: Наместо молитва и тишина, селфиња со папата

Селфиња покрај телото на папата Фрањо предизвикаа револт кај верниците

Околу 20.000 верници се собраа во Ватикан за да му оддадат последна почит на починатиот папа Фрањо, но неочекувано, сцени од селфиња со неговото тело предизвикаа гневот кај јавноста и разочараа многу присутни.

Папата Фрањо, кој почина во понеделник во 7:30 часот наутро од мозочен удар, а подоцна беше положен во Базиликата Свети Петар во рамките на тридневниот проштален обред пред погребот што ќе се одржи во сабота.

Иако илјадници верници стоеја со часови во ред за да оддадат почит, голем дел од вниманието се сврте кон несоодветното однесување на поединци кои се фотографираа покрај неговиот отворен ковчег.

На социјалните мрежи се појавија фотографии на кои посетителите, вклучително и некои свештени лица, позираат со телефони, а на една фотографија се гледа жена која се смее додека зад неа, во позадина, лежи телото на папата во сомот обложениот ковчег.

Верниците осудуваат: „Ова беше момент за почит, не за фотографии“

Голем број верници остро реагираа. Чуварите биле принудени да интервенираат на неколку локации за да спречат фотографирање.

Кетрин Џилсенан од Вимблдон, Лондон, која била присутна со сопругот, за The Sun изјавила: „Ме потресе тоа што успеав да му се доближам на папата Фрањо, но беа ужасни сцените со луѓе кои се фотографираат. Наместо тишина и молитва, некои избраа спектакл“.

Таа додала дека тие своите телефони ги чувале во џеб, токму заради почитта што ја чувствувале, и изразила жалење поради ваквото однесување на другите.

Поделени ставови – за некои фотографирањето е начин на почит

Од друга страна, имаше и такви кои го бранеа фотографирањето. Аргентинецот Матеус Силва изјавил дека чувствува гордост што може да се збогува со „првиот папа кој јавно застана зад ЛГБТ заедницата“.

Некои дури донеле и селфи стапови за подобар кадар, а меѓу луѓето кои фотографирале биле забележани и монахињи со телефони во рака.

Ковчегот со телото на папата ќе остане изложен во базиликата до петок, пред официјалниот погреб.

Иако овој чин требаше да биде момент на достоинствена почит, контроверзите околу фотографирањето фрлија сенка врз церемонијата и повторно го отворија прашањето за границите на дигиталната ера и што значи вистинско оддавање почит во 21 век.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.