Тајна во шумата: Дали најголемото нацистичко богатство се крие под германско-чешката граница?
На длабочина од 40 метри, во строго запечатен бункер, во близина на границата меѓу Германија и Чешка, можеби се наоѓа едно од најголемите изгубени богатства од Втората светска војна – вредно повеќе милијарди евра.
Ова го тврди австрискиот новинар и автор Бурхарт Лист (75), кој повеќе од четири децении се занимава со истражување и трагање по изгубени уметнички дела, украдени и скриени од нацистите пред крајот на војната.
Најголемата колекција на француски импресионисти надвор од Франција?
Во фокусот на неговата потрага се уметничките дела од вредната колекција на баронот Ференц Хатвани – унгарски индустријалец, чие семејство го загубило целото богатство за време на окупацијата на Будимпешта. Хатвани преживеал, но починал во Швајцарија во 1958 година.
Според Лист, во подземниот бункер се наоѓаат најмалку 800 слики – дел од нив ремек-дела од Моне, Дега, Реноар, Сезан и други великански имиња на импресионизмот. Во 1963 година, вредноста на колекцијата се проценувала на 400 милиони германски марки. Денес, тоа е еквивалент на најмалку четири милијарди евра.
„Тоа е најголемата колекција на француски импресионисти надвор од Франција“, вели Лист, кој смета дека може да го пронајде изгубеното богатство до крајот на 2025 година – доколку добие соодветни дозволи и финансиска поддршка.
Бункер затворен со експлозив – но сѐ уште недостапен
Истражувајќи со помош на географски и историски податоци, Лист тврди дека го лоцирал бункерот, кој е запечатен со прецизна детонација на ТНТ. Убеден е дека токму таму, уште во 1944 година, озлогласените единици на СС и Гестапо ги складирале украдените уметнички дела, заедно со злато, накит и други вредности – главно одземени од Евреите во Унгарија.
„Верувам дека станува збор за централен магацин на СС, и дека богатството било дел од план за создавање Четврти Рајх“, изјави Лист.
Бункерот, според него, се наоѓа длабоко под шума во близина на селото Дојчкатхариненберг – регион познат по стари рудници и тунели.
Политички пречки и „саботажа“ на истрагата?
Во 2024 година, истражувањето на Лист било запрено – откако, наводно, во близина бил откриен артефакт од камено доба. Целиот регион веднаш бил прогласен за археолошко наоѓалиште, а австрискиот истражувач останал без дозвола за натамошни ископувања.
„Моето откритие нема никаква поврзаност со камениот боздоган најден на илјада метри оддалеченост. Но, сепак, властите го искористија тоа како изговор“, посочува Лист.
Тој смета дека станува збор за свесен обид да се спречи пристапот и да се сокрие вистината.
„Намерата да се оневозможи пристапот е очигледна. Тоа отсекогаш беше и остана целта на саксонските власти“, вели Лист, додавајќи дека е потребна поддршка од инвеститори кои ќе го препознаат овој проект како мировна иницијатива, а не како средство за профит.
