Зеленски: Ракетата што го погоди Киев е севернокорејска, содржи компоненти од САД
Украинскиот претседател Володимир Зеленски денес преку социјалните мрежи соопшти дека ракетата употребена во вчерашниот разорен напад врз Киев, во кој загинаа 12 лица, а над 90 беа повредени, е произведена во Северна Кореја.
„Недостатокот на доволен меѓународен притисок врз Русија ѝ дозволува да увезува вакви ракети и друго оружје, кое подоцна го користи тука – во срцето на Европа“, рече Зеленски. Тој додаде дека истото важи и за Северна Кореја и нејзините сојузници, кои, според него, непречено продолжуваат со производството на балистички ракети.
Зеленски истакна дека ракетата што го погодила Киев содржела најмалку 116 компоненти од странско производство, од кои, како што нагласи, „за жал, најголемиот дел се направени во Соединетите Американски Држави“.
Претседателот ја искористи можноста да предупреди и за поширокиот контекст на војната, посочувајќи дека во денешниот свет, ниту една жртва на агресија не се брани само од еден непријател.
„Секоја војна брзо прераснува во конфликт со вклучени повеќе актери. Затоа одбраната мора да биде резултат на колективни напори“, рече тој.
Зеленски повторно апелираше за засилен и итен меѓународен притисок врз Москва.
„Веќе 45 дена Украина го има прифатено предлогот на претседателот Трамп за прекин на огнот – на небото, на море и на копно. Понудивме да го продолжиме, особено за време на Велигден. Дури директно предложивме Русија да престане да ги напаѓа цивилните цели. Но, сè беше одбиено“, посочи украинскиот лидер.
Тој додаде дека без сериозен меѓународен притисок врз Кремљ, нема да има реален напредок кон мир.
„Запирањето на убиствата мора да биде прв приоритет“, заклучи Зеленски.
