Свет

Зеленски се огласи после средбата со Трамп во Рим, каде двајцата присуствуваа на погребот на папата

Симболична средба меѓу Зеленски и Трамп во Рим – најавен „целосен и безусловен прекин на огнот“

Претседателот на Украина, Володимир Зеленски, денеска изјави дека имал „добар и конкретен“ разговор со американскиот претседател Доналд Трамп во Рим, каде што двајцата лидери присуствуваа на погребот на папата Франциск. Разговорот, како што оцени Зеленски, може да се покаже како „историски“.

„Имавме добар состанок, лице в лице. Разговаравме за многу теми. Се надеваме на резултати од сè што беше опфатено – заштита на животите на нашите луѓе, целосен и безусловен прекин на огнот и сигурен, траен мир што ќе спречи нова војна“, објави Зеленски на социјалната мрежа X.

Портпаролот на украинскиот претседател потврди дека Трамп и Зеленски се договориле да ги продолжат разговорите и во текот на денот, а нивните тимови веќе работат на организација на следната средба. Белата куќа го оцени разговорот како „продуктивен“.

Средбата доаѓа во чувствителен момент за Украина, откако САД се заканија дека би можеле да се повлечат од мировните напори, а претходно оваа недела Трамп јавно го критикуваше Зеленски поради неговиот став дека Украина нема да ја признае руската анексија на Крим.

Зеленски додаде дека овој разговор со Трамп, иако симболичен по својот контекст, може да стане историски доколку резултира со конкретни чекори и вистински напредок на патот кон мирот.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.