Дежурниот јавен обвинител од Основното јавно обвинителство во Скопје изврши увид на лице место во близина на трговскиот центар „Чаирчанка“, каде рано утрово се случи тешка сообраќајна несреќа во која загина 16-годишен возач на мотоцикл.
Првичните информации покажуваат дека момчето било без возачка дозвола и заштитна кацига, а се движело со брзина над дозволената. На местото на несреќата, не успеал да избегне 14-годишно дете кое управувало со електричен тротинет. Во сударот, возачот на мотоциклот претрпел тешки повреди од кои починал на лице место. Малолетникот кој возел со тротинетот е повреден и задржан на лекување.
Со цел да се утврдат точните причини за несреќата, јавниот обвинител издал наредби за обезбедување и преглед на снимките од видео надзорот на местото на настанот. Исто така, издадена е наредба за обдукција на телото на починатиот, а кај малолетникот кој управувал со тротинетот ќе бидат извршени анализи за евентуално присуство на алкохол или други недозволени супстанции.
