Северна Кореја испратила илјадници војници и вооружување на Русија – официјална потврда од Москва
Русија за првпат официјално потврди присуство на севернокорејски војници во војната против Украина. Според изјавата на началникот на Генералштабот на руските вооружени сили, Валериј Герасимов, севернокорејските трупи учествуваат во борбите во регионот на Курск, каде што, според него, покажале „висок професионализам, сила, храброст и јунаштво“, борејќи се рамо до рамо со руските сили.
Герасимов го информирал претседателот Владимир Путин за тековната состојба во Курск и посебно го истакнал значењето на соработката со Демократската Народна Република Кореја, во рамки на Договорот за сеопфатно стратешко партнерство меѓу двете земји.
Дополнително, портпаролката на руското Министерство за надворешни работи, Марија Захарова, на својот канал на Телеграм им оддаде почит на севернокорејските војници, нарекувајќи ја нивната солидарност „вистински сојузничка“ и доказ за цврстите врски меѓу Москва и Пјонгјанг.
Според украинските власти, Северна Кореја испратила околу 14.000 војници на руска страна, како и дополнителни 3.000 како засилување поради загубите на фронтот. Покрај човечка сила, Корејците наводно испратиле и огромни количини на артилериска муниција, ракетни системи и балистички ракети, кои Русија почнала да ги користи во нападите врз Украина уште кон крајот на 2023 година.
Рускиот претседател Путин во саботата изјави дека токму севернокорејската поддршка одиграла клучна улога во „ослободувањето на целата територија на Курскиот регион“. Но, Киев веднаш ја демантираше оваа изјава, тврдејќи дека нивните сили сè уште се активни во областа и не се протерани.
Ова е првпат Москва официјално да признае директно воено присуство на странски трупи, а конкретно на севернокорејските сили, на украинското боиште. Засега, Пјонгјанг нема дадено јавна потврда или коментар на ваквите информации.
