Република

Коњановски: Новата улица во Битола ќе донесе подобра инфраструктура и услови за развој на стопанството

Градоначалникот на Битола, Тони Коњановски, заедно со заменикот градоначалник Бојан Бојкоски и претставници од општинската администрација, изврши теренски увид на градежните активности за изградба на улицата СТУ 3 во поранешната касарна – населба АРМ.

Проектот опфаќа изградба на фекална канализација во должина од 404,8 метри и атмосферска канализација од 601,74 метри, со вкупна вредност од 7,5 милиони денари. Работите ги изведува КЈП „Нискоградба“, а според планот, ќе траат 40 работни дена. Во наредната фаза ќе се поставува и нова водоводна инсталација од 398 метри, со вредност од 2 милиони денари, за што ќе биде надлежно ЈП „Водовод“.

Новопроектираната улица ќе ги поврзе „Глигор Прличев“ и „Рокдајл“ и ќе биде долга 421 метар, со повеќе од 100 нови паркинг места. Целокупната инвестиција за инфраструктурата изнесува речиси 20 милиони денари.

Градоначалникот Коњановски истакна дека со овој зафат значително ќе се подобрат условите за живот на жителите и ќе се овозможи подобар пристап до деловните субјекти во реонот. Меѓу нив е и ИТ-компанијата X3M Labs, која беше посетена од општинската делегација. Компанијата вработува 50 лица и се занимава со развој на софтверски решенија за веб и мобилни апликации, како и со аутсорсинг и ИТ консалтинг за клиенти од Европа и САД.

Од компанијата упатија благодарност до општината за инфраструктурната поддршка, која, како што посочија, е клучна за нивниот понатамошен развој.

Република

ОБЈАВЕНА ПРОГРАМАТА НА „ЗИМСКА ПРИКАЗНА“ ВО БИТОЛА

Прочитајте ги секојдневните програмски содржини на фотографиите или разгледајте ја Програмата на „Зимска приказна“ на следниот линк:
https://www.bitola.gov.mk/zimska-prikazna-25-26/

Од 20 декември до 5 јануари, не пропуштајте да бидете дел од „Зимска приказна“.

Многу музика, детска програма, кино на отворено, возот „Мечо“, празничниот автобус и уште многу други содржини за сите генерации.

Годинава, бројките ја потврдуваат приказната:
-над 200 часа програма низ целиот град
-од нив, околу 35 часа детска програма
-67 бендови
-повеќе од 20 соло изведувачи
-5 фолклорни друштва
-2 градинки и 11 училишта како активен дел од програмата

Ова е најголемиот зимски фестивал во Македонија веќе неколку години.
Ова е декемврискиот ритам на Битола.

Република

ВЛЕН: Волјата на граѓаните ќе се потврди на изборите во Гостивар и Врапчиште

Коалицијата ВЛЕН најави силен настап на претстојните локални избори што ќе се одржат на 11 јануари, со јасна стратегија и поддршка за кандидати кои, како што велат од коалицијата, ја претставуваат волјата на граѓаните.

Во Општина Гостивар, ВЛЕН ќе настапи со реден број 1 на гласачкото ливче, предводена од кандидатот за градоначалник Невзат Бејта. Во Врапчиште, пак, коалицијата ја поддржува независната кандидатура на Зулхајрат Демири, кој се наоѓа под реден број 5.

Од ВЛЕН посочуваат дека симболиката на броевите 1 и 5 е во духот на слоганот „Еден глас“, кој ја отсликува нивната политика заснована на одлуки што произлегуваат директно од граѓаните.

Коалицијата потсетува дека веќе остварила победа во 10 општини, што, според нив, претставува јасен сигнал дека албанските гласачи ја отфрлиле, како што ја нарекуваат, политичката манипулација позната како „референдум“. ВЛЕН оценува дека ова е доказ за промената што ја бараат граѓаните и за слабеењето на политичките структури кои, според нив, денес формално опстојуваат само во Гостивар и Врапчиште.

„11 јануари е датум кога оваа волја повторно ќе се потврди“, порачуваат од коалицијата, повикувајќи ги граѓаните на Гостивар и Врапчиште да се обединат и да гласаат – број 1 во Гостивар и број 5 во Врапчиште – за, како што наведуваат, победа и власт што работи во интерес на народот.

Република

Повеќе тетовски села утре без електрична енергија поради планирани прекини

Повеќе села во тетовскиот регион утре, 18 декември, ќе останат без електрична енергија поради планирани прекини во снабдувањето со струја, информираат надлежните служби.

Без струја во периодот од 09:00 до 14:00 часот ќе бидат делови од селото Челопек, и тоа објекти лоцирани во средниот дел на селото, како и објекти во близина на училиштето. Исто така, прекин во снабдувањето ќе има и во селото Милетино, каде без електрична енергија ќе останат објекти во близина на автобуската станица во т.н. Македонско Маало.

Планиран прекин е најавен и за селото Порој, каде дел од населението исто така ќе биде без струја во истиот временски интервал.

Од надлежните апелираат граѓаните навремено да ги планираат своите обврски и информираат дека прекините се дел од редовни активности за одржување и унапредување на електродистрибутивната мрежа.