Поранешниот висок функционер на ДУИ, Бујар Дардишта, кој раководеше со повеќе државни институции, се најде во центарот на истрагата на органите на редот.

Акцијата, според информациите, започнала во текот на ноќта меѓу 17 и 18 декември 2025 година и е реализирана од Одеелот за сузбивање на организиран и сериозен криминал при БЈБ – МВР, во координација со Основното јавно обвинителство за гонење организиран криминал и корупција. Истрагата е насочена кон сузбивање на организирана криминална група осомничена за кривични дела од областа на корупцијата и економскиот криминал.

Според досегашните информации, претреси се извршени на повеќе локации во Скопје и Куманово, при што се одземени парични средства во различни валути, мобилни телефони, лаптопи, хард дискови и финансиска документација од значење за истрагата. Во моментов, според неофицијални извори, претреси се спроведуваат и во два правни субјекти на овие подрачја.

Информацијата се уште нема официјална потврда ниту од МВР ниту од Јавното обвинителство.

Бујар Дардишта беше директор на Управата за водење на матични книги, а потоа управуваше со едно од новоформираните претпријатија на ЕСМ за топлинска енергија, наследник на БЕГ. Тој стана предмет на јавна критика кога Државниот завод за ревизија откри дека во 2019 година, додека тој беше директор на Управата, биле издадени 21.957 погрешни изводи, односно 4% од вкупниот број издадени изводи. Ревизијата откри кусок од 94.451 извод во матичните книги во Скопје, Тетово, Ресен, Гостивар и Прилеп, за кои не биле наплатени административни такси.

Последниот јавен настап на Дардишта беше на собирот на УЧК во центарот на Скопје, каде тој беше дел од организациониот одбор.

Системот на евиденција во возачките дозволи и негативните поени, кој досега не беше целосно уреден, се прецизира со новите законски измени. Од 1 февруари следната година, секој возач што во рок од четири години трипати ќе добие правосилна забрана за управување возило од иста категорија, ќе остане без возачка дозвола. Судот ќе ја одземе дозволата, а прекршителот нема да смее повторно да полага возачки испит најмалку една година.

По одземањето на дозволата, судската одлука ќе биде доставена до Министерството за внатрешни работи, по што возачот ќе добие СМС-порака или известување по електронска пошта дека возачката дозвола му престанува да важи во рок од осум дена.

Забраната за управување возило, која ја определува судот, може да трае од еден месец до една година. Податоците за изречените мерки ќе им бидат достапни и на граничните служби. Доколку забраната е изречена на странец со странска возачка дозвола, тој нема да смее да управува возило на територијата на државата, а за тоа ќе биде известена и граничната полиција.

Измени се предвидени и во Законот за возила. Секој сопственик на возило, при промена на телефонски број или електронска пошта, ќе мора во рок од три дена да ги ажурира податоците во станицата за технички преглед. Непочитувањето на оваа обврска ќе се санкционира со глоба од 100 евра, а за правните лица се предвидени казни во зависност од нивната големина.

Со измените во Законот за безбедност на сообраќајот на патиштата се воведува толеранција при мерењето на брзината, при што од измерената вредност задолжително ќе се одзема маргината на грешка на мерниот уред, без прецизирање на нејзината висина. Воедно, се забранува управување возило под дејство на опојни дроги и психотропни супстанции.

Новите правила носат и дополнителни обврски за автошколите, со што кандидатите за предавачи, инструктори, контролори и испитувачи на сообраќајни правила ќе мора да полагаат стручен испит пред комисија во МВР. Законот ги прецизира и зоните со смирен сообраќај, со воведување „зона училиште“ и „зона 30“.

Промени се направени и во Законот за извршување на санкциите, како и во Законот за полиција, со цел целосна примена на новиот систем за контрола и санкционирање во сообраќајот.

Трајно и задолжително одземање на возилата за најтешките сообраќајни прекршители предвидуваат измените и дополнувањата на Кривичниот законик, кои група пратеници од ВМРО-ДПМНЕ ги поднесоа во Собранието. Со законските измени се воведуваат значително построги санкции за возачи кои управуваат пребрзо, под дејство на алкохол или дроги, особено доколку станува збор за лица кои и претходно биле осудувани за кривични дела против безбедноста во сообраќајот.

Според предлогот, возилото задолжително ќе се одзема ако сторителот управувал со брзина поголема за најмалку 70 километри на час во населено место или 90 километри на час надвор од населено место, под услов возачот и претходно да бил осудуван за исто или слично кривично дело. Задолжително одземање се предвидува и доколку возилото е во сопственост на сторителот, а тој во моментот на делото немал право да управува со моторно возило.

Ако прекршокот е сторен со туѓо возило, истото ќе се одземе само доколку сопственикот знаел или бил должен да знае дека лицето кое управува нема право да вози.

Новина во законските решенија е и задолжителната забрана за управување со моторно возило, која ќе се изрекува во траење од шест месеци до 10 години. Дополнително, судот ќе може да изрече и престанок на важењето на возачката дозвола од определена категорија во период од една до 10 години, за време на кој сторителот нема да може повторно да стекне дозвола од истата категорија. Досега, ваквата забрана беше ограничена на максимум пет години.

Измените предвидуваат и затворска казна од три месеци до три години или парична казна за секој што ќе го загрози јавниот сообраќај со безобѕирно управување, односно возење со концентрација на алкохол над 1,5 промили, под дејство на дроги или психотропни супстанции, возење во спротивна насока, опасно претекнување, како и значително пречекорување на дозволената брзина. Со иста казна ќе се санкционираат и организаторите и учесниците во нелегални улични трки, како и лицата кои управуваат возило без положен возачки испит или без важечка возачка дозвола.

Во образложението на предлог-законот се наведува дека измените се резултат на сериозните предизвици со кои државата се соочува последните години во делот на сообраќајната безбедност, а како аргумент се наведуваат и компаративни искуства од Словенија и Австрија.

Предлагачите потенцираат дека законските измени се дел од поширок пакет мерки поврзани со проектот „Сејф сити“, чија цел е драстично намалување на тешките сообраќајни прекршоци и зголемување на безбедноста на патиштата.