Краткотрајните примирја – нова специјалност на Кремљ?
Во последно време, сè почесто се поставува прашањето: кога примирјето претставува искрен обид за мир, а кога е само политички маневар за односи со јавноста? Особено кога зборуваме за рускиот претседател Владимир Путин.
Путин неодамна најави ново, тридневно еднострано примирје, од 8 до 10 мај, во чест на 80-годишнината од крајот на Втората светска војна. Кремљ го претстави потегот како “хуманитарен гест”, очекувајќи и Украина да го следи примерот. Пред само неколку недели, Русија прогласи 30-часовно примирје за православниот Велигден, што исто така беше оправдано со “хуманитарни причини”.
Но, украинската страна одговори со скепса. Министерот за надворешни работи, Андриј Сибихa, праша зошто Русија чека до 8 мај ако навистина сака мир и побара примирјето да трае најмалку 30 дена. „Ако Русија навистина сака мир, нека престане со огнот веднаш“, порача Сибихa.
Во меѓувреме, одекнуваат сомнежи дека станува збор за уште еден ПР трик насочен кон меѓународната заедница, а особено кон Белата куќа и американскиот претседател Доналд Трамп. Анализата на BBC предупредува дека и покрај повиците на Путин за примирје, руските сили за време на велигденскиот прекин на огнот биле обвинети од Киев дека неколку пати го прекршиле.
Москва ја искористи паузата за да ја обвини Украина дека го игнорира “маслиновото гранче”, притоа претставувајќи се себеси како страна што тежнее кон мир. Но, Трамп, барем засега, не изгледа убеден. На својата платформа Truth Social напиша: „Нема причина Путин последниве денови да испукува ракети врз цивилни цели ако навистина сака да го заврши овој конфликт“. Тој дури размислува за нови “банкарски” и “секундарни санкции” кон Русија, оценувајќи дека предолго трае крвопролевањето.
Иако Кремљ се обидува да ја претстави Русија како “добриот”, реакцијата од Вашингтон не е охрабрувачка. Портпаролката на Белата куќа, Каролин Левит, изјави дека Трамп сака вистински, траен прекин на огнот, а не симболични потези.
Потсетување: минатиот месец администрацијата на Трамп предложи 30-дневно безусловно примирје – Украина го прифати, Русија не.
Сега, руски официјални лица повторно ја користат понудата за тридневно примирје како алатка за дискредитација на Киев.
Претседателот на Државната дума, Вјачеслав Володин, за државната телевизија изјави дека „тешко е да се поверува дека претседателот Зеленски ќе го поддржи повикот на Путин“.
BBC заклучува дека ова не е добар сигнал – ниту за мирот, ниту за искреноста на Кремљ.
