Бучковски: Новата власт во Македонија не е заинтересирана да станеме членка на ЕУ

Бучковски: Македонија беше лидер во евроинтеграциите, но ја изгубивме предноста по 2006 година

Во гостување за црногорската емисија „Граѓански агол“, поранешниот премиер Владо Бучковски изјави дека Македонија била лидер во евроинтеграциите на Западен Балкан во 2005 година, додека тој бил на чело на Владата. Сепак, според него, промената на власта во 2006 година била пресудна и земјата ја изгубила таа позиција.

„Македонија изгуби десет години во расправии и провокации кон Грција од 2006 до 2016. Наместо да влеземе во НАТО уште во 2008 година, станавме членка дури во 2020“, рече Бучковски, алудирајќи на застојот предизвикан од долгогодишниот спор за името.

Говорејќи за процесот на интеграција во Европската Унија, Бучковски се наврати и на 2019 година, кога, како што вели, Франција го блокираше напредокот на Македонија, и покрај жртвите што земјата ги направи.

„Некоректна беше одлуката на Емануел Макрон да не ја награди Македонија за големата жртва што ја направи. Во 2019, наместо да добиеме датум за почеток на преговорите, тој започна со некои реформи со цел ЕУ да се посвети на себе, а не на проширувањето. Тоа калкулирање на ЕУ го искористи Бугарија, тие тргнаа со свои барања и тоа доведе до нови блокади“, истакна Бучковски.

Во врска со сегашната власт, тој оценува дека ВМРО-ДПМНЕ, додека беше во опозиција, ги злоупотребувала клучните договори со соседите – Преспанскиот договор и Договорот со Бугарија. Но, откако дојде на власт, не покажала јасна стратегија за напредок кон Европската Унија.

„Тие тврдеа дека кога ќе дојдат на власт ќе го вратат старото уставно име Република Македонија, потоа дека за шест месеци ќе успеат да направат компромис со Бугарија и дека ќе ги отворат преговорите со ЕУ. Помина една година од новата власт во Македонија и не гледа дека на новата влада приоритет ѝ е влезот во ЕУ“, порача Бучковски.