САД ѝ се обратија на Кина со иницијатива за разговори околу царините од 145 отсто, воведени од администрацијата на претседателот Доналд Трамп. Од Пекинг пристигна сигнал дека се отворени за дијалог, што дава надеж за можност за смирување на трговските тензии.
Според кинеското Министерство за трговија, американската страна мора да покаже искреност и да се откаже од едностраниот пристап во воведувањето царини. Во соопштението јасно се наведува дека дијалогот не треба да се користи како средство за притисок и уцена, бидејќи такви обиди нема да бидат успешни.
Кина досега јавно го изрази своето незадоволство поради овие високи царини, потенцирајќи дека тие нема да го сопрат економскиот раст на земјата, која е втора најголема економија во светот. Како дел од својата стратегија, освен преку медиумски канали, Пекинг изработи и листа на американски производи – вклучувајќи фармацевтски средства, микрочипови и млазни мотори – што ќе бидат изземени од одмаздничките царини од 125 проценти.
И од американска страна се гледа желба за деескалација. Министерот за финансии Скот Бесент и економскиот советник на Белата куќа Кевин Хасет изразија надеж за напредок во преговорите.
Државниот секретар Марко Рубио за Фокс Њуз изјави дека Кина е подготвена да разговара, и оти тие разговори ќе се одржат наскоро. Тој додаде дека САД размислуваат и колку ќе се потпираат на увоз од Кина во иднина. Пред само два дена, Трамп изјави дека „има многу добра шанса“ за постигнување договор со Пекинг.
Кинескиот претседател Си Џинпинг, пак, повика на прилагодување кон новите глобални услови, без притоа конкретно да ги спомне САД.
