Тензии на контролната линија: Пакистанскиот дел на Кашмир повикува на подготвеност
Властите во пакистанскиот дел на Кашмир ги повикаа жителите кои живеат во близина на фактичката граница со Индија да направат залихи од храна, поради растечките тензии меѓу двете земји. Повикот доаѓа откако конфликтот ескалира по смртоносниот напад во индискиот Кашмир во април, во кој загинаа 26 цивили.
Индија го обвинува Пакистан за организирање на нападот во Пахалгам, обвинување што Исламабад категорично го негира. Во меѓувреме, вооружените престрелки долж линијата на контрола (LoC) продолжуваат осма ноќ по ред, а дипломатските тензии се продлабочуваат.
Премиерот на пакистанскиот Кашмир, Чаудри Анвар ул Хак, соопшти дека властите наложиле на населението во 13 погранични изборни единици да обезбеди резерви на храна за период од најмалку два месеца. Дополнително, формиран е итен фонд во вредност од една милијарда пакистански рупии (околу 3 милиони евра) за набавка на основни средства – прехранбени продукти и лекови.
Како дел од подготвителните мерки, на терен се ангажирани и машини за одржување на патиштата во овие чувствителни региони.
Стравот од поширок вооружен конфликт расте откако индискиот премиер Нарендра Моди ѝ даде целосна слобода на армијата за дејствување. Пакистан, пак, тврди дека има разузнавачки информации за можно индиско нападно сценарио, и најавува силен и решителен одговор доколку дојде до агресија.
Како дополнителна мерка на претпазливост, пакистанските власти затворија повеќе од 1.000 верски училишта во регионот. Конфликтот околу Кашмир трае уште од 1947 година, кога престана британската колонијална власт на индискиот потконтинент.
