Тајландски милијардер осуден на 24 години затвор поради проширување на луксузен голф-центар во заштитено подрачје
Тајландски суд го осуди металуршкиот тајкун Прајуд Махагитсири на 24 години затвор за нелегално проширување на неговиот луксузен голф-центар и приватна резиденција во рамки на природен резерват, јавуваат локалните медиуми.
Обвиненијата против 79-годишниот милијардер беа покренати во 2021 година, откако антикорупциските органи утврдија дека Махагитсири потплатил државни службеници за да добие имотни листови и дозвола за проширување на неговиот комплекс „Маунтајн Крик“ во провинцијата Након Ратчасима, североисточно од Бангкок.
Ова луксузно одморалиште, кое вклучува голф-терен со 27 дупки, се протега на површина од 360 хектари. Според пресудата, најмалку 30 хектари од таа површина се наоѓале во заштитена зона, каде вакви интервенции се строго забранети.
Централниот кривичен суд за корупција и проневера го прогласи Махагитсири за виновен по повеќе основи – од поткуп до незаконско навлегување во државен имот. Освен него, уште 10 други лица беа осудени во истиот случај, меѓу кои и неговата ќерка, која доби казна од 12 години затвор.
Прајуд Махагитсири е познат како еден од водечките бизнисмени во индустријата за челик и кафе, а според Forbes, неговото богатство во 2024 година се проценува на 2,6 милијарди долари, што го рангира како десетти најбогат човек во Тајланд. Одбраната најави поднесување жалба на судската одлука.
Инаку, иако голфот е една од водечките туристички атракции во Тајланд, еколошките организации редовно го критикуваат поради неговото негативно влијание врз животната средина, особено поради интензивното користење на вода и уништување на природни живеалишта заради уредување терени.
