Украинскиот министер за надворешни работи, Андриј Сибиха, изјави дека во рамките на можен мировен договор, не смее да се дозволи Русија да има право на вето за членството на Украина во НАТО. Сибиха нагласи дека Украина нема да прифати мир по секоја цена и ги презентираше „црвените линии“ во преговорите, кои, како што рече, се „јасни и непроменливи“.
„Прво и основно, не смееме да прифатиме признавање на каква било привремено окупирана територија на Украина како дел од Русија“, изјави тој.
Министерот додаде дека Украина нема да прифати никакви ограничувања на структурата или големината на нејзините вооружени сили, ниту намалување на одбранбената индустрија, како и ограничувања на воената помош од сојузниците или присуството на странски војници на нејзина територија.
„Трето, нема да дозволиме никакви ограничувања на суверенитетот на Украина, ниту на нашата внатрешна или надворешна политика, вклучувајќи ги и изборите за сојузи и воени блокови на кои сакаме да им се приклучиме“, нагласи Сибиха.
Според него, иако моментално не постои консензус меѓу сојузниците во однос на членството на Украина во НАТО, Киев ќе продолжи да работи активно за постигнување на оваа цел.
„Но, Русија или било која друга држава немаат и нема да имаат право на вето над нашиот избор“, истакна Сибиха.
Потпретседателот на САД, Џеј Ди Венз, изјави за Фокс Њуз дека војната во Украина нема да заврши „скоро“, додека американскиот шеф на дипломатијата, Марко Рубио, оцени дека иако Русија и Украина се „поблиску“ до договор за мир, сепак остануваат „далеку“.
