Американската војска започна со голема реформа – секоја дивизија со 1.000 дронови
Американската армија официјално ја започна најголемата реформа на своите Копнени сили во последниве децении, со план да ја опреми секоја борбена дивизија со околу 1.000 дронови и да се ослободи од застарената воена опрема. Како што објави угледниот Wall Street Journal, оваа трансформација се темели на повеќе од една година тестирања и вежби на полигони во Баварија и во други бази низ САД.
Клучната инспирација доаѓа од војната во Украина, каде употребата на евтини и мали беспилотни летала целосно го промени начинот на водење борби. „Мораме да научиме како да ги користиме дроновите, како да се браниме од нив, како да ги произведуваме и да ги интегрираме во нашите операции. Дронови сме имале и досега, но во многу ограничен број“, изјави полковник Доналд Нил, командант на 2. коњанички полк на САД.
Доколку реформата биде спроведена како што е планирано, сите 10 активни борбени дивизии на американската војска ќе користат дронови за извидување, логистика и напади. Паралелно, армијата работи на унапредување на комуникациските капацитети меѓу единиците, преку мобилни технологии, интернет мрежи и таблети.
Според извештајот, се предвидува инвестиција од околу 3 милијарди долари во развој на напредни системи за неутрализирање на непријателски дронови, како и во подобрување на капацитетите за електронско војување. Во следните пет години, САД ќе потрошат вкупно 36 милијарди долари за целосна имплементација на реформата, заснована на искуствата од украинскиот конфликт.
Со цел да се обезбедат овие средства, американската армија планира да ги повлече застарените оружја од употреба, да го намали бројот на цивилен персонал и да спроведе други мерки за оптимизација. Инаку, полигонот Хоенфелс во Баварија, кој денес се користи за тестирање на новите концепти, беше клучна база за подготовка за потенцијална советска инвазија за време на Студената војна.
