Свет

Хамас е подготвен за траен мир? Турција откри нови детали

Фидан: Хамас е подготвен за договор што оди подалеку од привремено примирје

Турскиот министер за надворешни работи, Хакан Фидан, изјави дека разговорите со раководството на Хамас откриле подготвеност за постигнување договор што надминува само привремено примирје, со цел трајно решение на конфликтот со Израел.

Фидан ова го соопшти по средбата со неговиот катарски колега, Мохамед бин Абдулрахман Ал Тани, што се одржа во неделата. Тој нагласи дека Хамас би го прифатил секој договор кој вклучува т.н. решение со две држави.

„Палестинската страна покажува отвореност за прекин на огнот во Газа, додека Израел останува непопустлив“, изјави Фидан.

Според последните податоци, бројот на загинати во Појасот Газа достигна 52.243 лица, а бројот на повредени изнесува 117.639 од почетокот на израелската офанзива на 7 октомври 2023 година. Дополнителни 697 жртви се додадени на официјалниот биланс откако беа потврдени од правосудниот комитет кој ги следи случаите на исчезнати лица.

Во меѓувреме, високата делегација на Хамас, предводена од претседателот на Советот на движењето, Мохамед Дарвиш, го напушти Каиро во саботата навечер, по неколку дена интензивни разговори со египетски претставници.

Разговорите биле фокусирани на воспоставување трајно примирје во Газа, олеснување на размената на затвореници и справување со тешката хуманитарна состојба во регионот.

Во соопштението по разговорите, Хамас ја истакна итната потреба од прекин на огнот и повика на поголема меѓународна поддршка за ставање крај на конфликтот.

„Нашата визија за траен мир подразбира трајно примирје, размена на затвореници, итна достава на хуманитарна помош и започнување на процесот на реконструкција на Појасот Газа“, стои во соопштението на делегацијата.

Претставниците на Хамас исто така предупредија на „катастрофалната хуманитарна ситуација“ како резултат на повеќе од два месеца блокада од израелските сили, при што е сериозно ограничен влезот на основни намирници, храна и медицински средства.

Свет

Германија воведува задолжителна воена обврска, казни до 1.000 евра за непослушните

Од јануари 2026 година, Германија официјално ќе започне со примена на нов модел на задолжителна воена обврска, со кој се предвидуваат и строги санкции за оние што ќе ја игнорираат процедурата. Сите мажи од одредена возрасна група ќе добиваат прашалници од Бундесвер, а одбивањето да се одговори или доставувањето неточни податоци ќе биде санкционирано.

Германското Министерство за одбрана соопшти дека процесот ќе започне со испраќање на околу 54.000 прашалници месечно. Според новите правила, непочитувањето на оваа обврска може да резултира со парична казна до 1.000 евра, па дури и со принудна регрутација.

Планот, кој го иницира министерот за одбрана Борис Писториус, предвидува постепено зајакнување на армиските капацитети. Од јули 2027 година, задолжителен ќе стане и лекарскиот преглед за сите мажи, а непојавувањето на прегледот може да доведе и до полициско приведување.

Целта на новиот модел е до 2035 година бројот на припадници на германската армија да достигне 270.000 војници, како дел од пошироките напори за јакнење на одбранбените капацитети на земјата.

Свет

Русија изврши еден од најжестоките напади врз Украина пред Божиќ

Повеќе од 600 беспилотни летала и околу 30 проектили ја погодија украинската престолнина Киев и енергетската инфраструктура низ земјата, при што загинаа најмалку три лица, меѓу кои и дете. Станува збор за еден од најмасовните руски напади во последните месеци.

Украинскиот претседател Володимир Зеленски изјави дека нападите извршени непосредно пред Божиќ јасно покажуваат кои се приоритетите на Москва. Тој предупреди дека Русија подготвува нов бран удари по празниците, оценувајќи дека таквото однесување е „нормално за Русија“. Според него, ситуацијата дополнително се усложнува поради недостигот од системи за воздушна одбрана.

Воздушната тревога била активна во речиси цела Украина, а Министерството за енергетика воведе вонредни рестрикции во неколку региони. Во Киев, делови од градот останале без електрична енергија поради погодената инфраструктура.

Полска соопшти дека подигнала борбени авиони за заштита на својот воздушен простор, поради зголемените безбедносни ризици во регионот.

Украина Божиќ го слави на 25 декември според новиот календар, иако дел од населението сè уште го одбележува празникот и на 7 јануари, како и во Русија.

Во вечерното обраќање, Зеленски најави враќање на украинската делегација од Мајами, каде што се одржале мировни разговори со американскиот специјален претставник Стив Виткоф. Разговорите ги оцени како конструктивни, но без конкретен напредок.

Во меѓувреме, украинските сили извршиле напад врз голема нафтена постројка во Ставропол, управувана од рускиот енергетски гигант Лукоил.

Свет

Зеленски предупредува: Русија подготвува масивни напади по Божик

Претседателот на Украина, Володимир Зеленски, предупреди дека Русија би можела да започне интензивни напади за време на Божиќ. Во обраќање пред дипломатите во Киев, тој оцени дека е „сосема нормално“ Кремљ да се обиде да изврши масивни напади токму за празникот, нагласувајќи дека Украина се соочува со тешка ситуација поради недостиг на системи за воздушна одбрана.

Иако Украина официјално го слави Божиќ на 25 декември, многу граѓани го почитуваат православниот календар и го слават празникот на 7 јануари, исто како и во Русија.

Зеленски исто така објави дека украинската делегација, која учествуваше на преговори во Мајами со американскиот специјален претставник Стив Виткоф, се очекува денеска да се врати во Украина. Виткоф оцени дека разговорите со украинската и руската делегација биле „конструктивни“, без да навлезе во детали за постигнати договори.