Индија воведе забрана за увоз и транзит на стоки од Пакистан по терористички напад во Џаму и Кашмир
Индија денеска воведе итна забрана за увоз и транзит на стоки од Пакистан, како одговор на последниот терористички напад во регионот Џаму и Кашмир. Генералната дирекција за надворешна трговија на Индија соопшти дека мерката стапува на сила веднаш и ќе важи сè до понатамошно известување.
„Директниот или индиректниот увоз или транзит на каква било стока со потекло од Пакистан или извезена од Пакистан, без разлика дали нејзиниот увоз е слободен или дозволен на друг начин, е забранет со непосреден ефект. Ова ограничување се воведува во интерес на националната безбедност и јавниот ред“, се наведува во соопштението.
Индиските власти исто така појаснија дека секое евентуално исклучување од оваа забрана ќе мора да биде одобрено од Владата на Индија.
Забраната следи по ескалација на тензиите долж линијата на контрола меѓу двете земји, откако во вторникот попладне терористи нападнаа група туристи во близина на градот Пахалгам, во индискиот дел на Џаму и Кашмир. Во нападот загинаа 25 индиски државјани и еден државјанин на Непал. Одговорноста за нападот ја презеде групата Фронт на отпорот, поврзана со терористичката организација Лашкар-е-Таиба.
Како дополнителен одговор, Индија презеде серија остри дипломатски и економски мерки против Пакистан, вклучувајќи:
Протерување на пакистанските воени аташеа
Суспензија на Договорот за сливот на реката Инд, кој важи повеќе од шест децении
Затворање на копнената гранична транзитна точка Атари
Како реакција, Пакистан најави целосна суспензија на трговијата со Индија, вклучително и преку трети земји. Исламабад прогласи неколку индиски воени советници во амбасадата во Пакистан за персона нон грата, го затвори воздушниот простор за индиски авиокомпании и објави прекин на сите билатерални договори.
Пакистанската влада предупреди дека секој обид за пренасочување или запирање на водата која, според Договорот за води на реката Инд, му припаѓа на Пакистан, ќе се смета за чин на војна.
