Гувернерот на Херсонската област, Владимир Салдо, предупреди дека доколку украинската страна не го почитува прекинот на огнот за време на прославата на 80-годишнината од Големата победа, ќе следува итен одговор од руската страна.
„Одлуката на претседателот Владимир Путин да прогласи прекин на огнот во чест на Големата победа претставува чин на почит кон подвигот на нашиот народ“, изјави Салдо за „Спутник“. Според него, тоа е гест што доаѓа од позиција на сила и уверување во сопствената праведност. Но тој додаде и дека примирјето ќе се почитува само доколку и другата страна – Украина – се придржува до него. Во спротивно, како што рече, ќе следи итна реакција.
Во сличен тон се изрази и портпаролката на руското Министерство за надворешни работи, Марија Захарова. Таа го обвини украинскиот претседател Володимир Зеленски дека со својата, како што ја нарече, „екстремистичка банда“, ги поткопува мировните напори. Захарова истакна дека Москва има основани причини за загриженост, особено во контекст на претстојната воена парада во чест на 80-годишнината од Победата, посочувајќи на заканите што, според неа, доаѓаат од Киев и се насочени кон „болните точки“ на Русија.
