Економија
Димитриеска – Кочоска за „Алфа“: Домаќинското работење и инвестициите ги консолидираа состојбите и го намалија јавниот долг
Со домаќинско работење, намалување на непродуктивните трошења и напорите за подигнување на економската активност до намалување на јавниот долг за 4,7 пп на нивото од 57,7% од БДП. По подолг период македонскиот јавен долг се намали, не само процентуално, туку и во апсолутна бројка. Податоците за првиот квартал од годинава покажуваат дека јавниот долг е намален за 36 милиони евра. Министерката за финансии Гордана Димитриеска Кочоска за Алфа вели дека предизвиците од претходниот период биле големи, па морало да се консолидираат финансиите и внимателно да се трошат народните пари. Овие податоци според нејзе се дијаметрално спротивни од оние во времето на претходната влада, кога во истиот период лани јавниот долг бил зголемен дури за 292 милиони евра
„Вие може да слушате многу често дека одредени работи се штедат, се внимава, па како министерката за финансии во дадени ситуации е малку построга. Ние немаме друг избор освен да работиме домаќински. Премногу се задолживме во изминатите години. Сега граѓаните можат да споредуваат дали работиме домаќински со намален долг од 36 милиони евра во апсолутен износ или некој пред нас работел домаќински кога долгот го зголемил за 292 милиони евра за ист период, почеток на година, и минатата и оваа“ – вели Гордана Димитриеска Кочоска – министерка за финансии.
Политиката на Владата е домаќинското работење да продолжи. Јавниот долг може и дополнително да се намали на 55% од БДП преку висока реализација на инвестициите кои се спроведуваат пред се во делот на инфраструктурата. Министерката за финансии сепак е претпазлива во проекциите и вели дека е подобро да се излезе и со полоши проекции кои потоа ќе бидат побиени со добри економски резултати. Таа не отстапува од проекциите за економски раст од 3,7% годинава и покрај пониските очекувања на меѓународните финансиски институции. Најавува и прекројување на државната каса во јули, пред да се распишат локалните избори.
„Ќе имаме една мини прераспределба јас би ја рекла или прераспределба како што ја кажуваат во министерството за финансии во однос на овие проекти кои се пренаменети за општините. Ако се сеќавате во буџетот, ние ги предвидовме, меѓутоа беа ставени во „Функции на држава“ од причина што не можевме однапред да знаеме кој ќе биде интересот на општините, дали ќе сакаат повеќе проекти кои се поврзани со Министерство за транспорт или со Министерство за земјоделство, култура, спорт и заради тоа ги ставивме таму. Сега веќе имаме отприлика слика точно каде колку треба да се пренасочат средства и затоа ќе имаме една мини прераспределба, би рекла, а она што значи ребаланс на буџетот ќе биде некаде во месец јули пред да ги распишеме изборите“ – вели Гордана Димитриеска Кочоска – министерка за финансии.
Вкупниот јавен долг во моментов изнесува 9,58 милијарди евра. Државниот долг пак изнесува 8,3 милијарди евра. Ова е најнизок јавен долг како процент од БДП во последниве 5 години.
Економија
Што се случува во Србија? – Граѓаните масовно купуваат евра, менувачниците не можат да стигнат
Во некои делови на Србија се забележува недостиг од готови евра, а граѓаните масовно ги менуваат своите динари во странска валута, јавуваат локалните медиуми.
Според официјалниот курс на Народната банка на Србија (НБС), едно евро вреди 117,75 динари, но на терен цената е значително повисока. Во Бујановац, на пример, едно евро се продава за 120 динари, а менувачниците предупредуваат дека поради големата побарувачка оваа бројка наскоро може да биде надмината.
Ситуацијата се засилила поради продлабочувањето на кризата со НИС и стравувањата дека НБС може да се соочи со санкции од САД. Граѓаните масовно ги празнат своите штедни сметки и ги менуваат динарите во евра, додаваат менувачите.
НБС, сепак, потврдува дека недостигот на евра во одредени менувачници не значи дека има проблем со понудата на странска валута. Во банките и во Народната банка има доволно готовина, а каналите за снабдување функционираат непречено. Како што објаснуваат, менувачниците често ги снабдуваат едни со други и, во услови на зголемена побарувачка, ја зголемуваат цената на еврата за клиентите.
Во понеделник едно евро се купуваше за 119,5 динари, што е значително повисоко од официјалниот курс на НБС.
Економија
МБИ10 во пад од 0,15%, без активности на обврзничкиот пазар
Изготвен од Илирика Инвестментс АД Скопје врз основа на официјални податоци од Македонска берза.
На трговската сесија од 9 декември 2025 година, индексот МБИ10 бележи пад од 0,15%, спуштајќи се на 10.239,85 поени, при вкупен промет од 14,14 милиони денари. Тргувањето беше умерено, со најголем обем на активности кај Комерцијална банка, Алкалоид и Макпетрол, кои остануваат најликвидни хартии на официјалниот пазар. Индексот ОМБ остана непроменет на 128,73 поени, без реализирани трансакции со обврзници .
Најтргувани хартии од вредност
● Комерцијална банка АД Скопје (KMB) – 6.188.910 денари
● Алкалоид АД Скопје (ALK) – 3.053.560 денари
● Макпетрол АД Скопје (MPT) – 2.760.000 денари
● Алкалоид АД Скопје (ALK) +0,21%
● Гранит АД Скопје (GRN) –0,51%
● Стопанска банка АД Скопје (STB) –1,99%
● Раде Кончар АД Скопје (RDK) –17,46%
Во текот на денешната сесија не беа реализирани трансакции со државни или корпоративни обврзници. Индексот ОМБ остана стабилен на 128,73 поени, без промени. Тргувањето на Македонската берза на 9 декември 2025 година се одвиваше со вкупен промет од 14,14 милиони денари и пад на индексот МБИ10 за 0,15%. Најликвидни беа Комерцијална банка, Алкалоид и Макпетрол, со доминантен удел во дневниот промет. Најголем раст забележа Алкалоид, додека Комерцијална банка и Гранит беа меѓу губитниците на денот. Обврзничкиот пазар остана без активности, со непроменет индекс ОМБ.
Економија
Зголемување на минималната плата: Министерот Дурмиши најавува раст од 1.500 до 2.000 денари, одлуката ќе биде без притисок
Министерот за економија и труд, Бесар Дурмиши, нагласи дека одлуката за зголемување на минималната плата нема да биде донесена под притисок, туку исклучиво врз основа на законската методологија. Тој најави дека во март 2026 година, минималната плата ќе забележи раст во опсег од 1.500 до 2.000 денари.
Дурмиши потсети дека законската рамка предвидува минималната плата да се утврдува преку формула која ги зема предвид просечната плата и трошоците за живот.
„Кога ќе има усогласување во март следната година, врз основа на параметрите што ги имаме, граѓаните ќе имаат повисока минимална плата. Тоа е формула и методологија со која се пресметува минималната плата, со што се согласуваат Економскиот и социјален совет, синдикатите, работодавачите и Владата“, изјави министерот Дурмиши за ТВ Шења.
Формулата јасно дефинира дека пресметката на минималната плата е базирана на 50% од просечната нето плата од претходната година и 50% од растот на трошоците за живот.
Според достапните податоци за изминатите 11 месеци од тековната година, министерот очекува зголемувањето да изнесува приближно 1.500 до 2.000 денари, прецизирајќи дека конечната сума ќе зависи од исходот на пресметката во март.
Дурмиши исто така посочи дека Владата останува посветена на континуирано зголемување на минималната плата.
Со ова, се потврдува дека процесот на усогласување ќе се одвива според претходно договорената и прифатена методологија од сите социјални партнери.
-
Црна Хроника6 days agoПолициска акција: Уаспени Украинки во Горно Седларце – МВР со детали
-
Црна Хроника3 days agoОбид за кражба завршил со пожар во Брвеница – Полицијата со детали
-
Балкан2 days agoДрама во Србија: БМВ се заби во камион, возачот со цигара тврди: „Не знам, ме удри камион“ (ВИДЕО)
-
Република6 days agoЕве од кога ќе почнат да работаат камерите од „Безбеден град“ во Тетово и Куманово
-
Црна Хроника4 days agoПолицијата го лоцираше украденото „Ауди“ за неколку часа – младиот тетовец уапсен!
-
Магазин7 days agoРазрешена вековната дилема: Научниците конечно потврдија каде е погребан Филип Втори Македонски
-
Скопје5 days agoСекое застанување на булевар на „пет минути“ ќе се санкционира, вели Топаловски
-
Економија2 days agoКинескиот канал Солун–Дунав повторно актуелен: Македонија би била клучна транзитна точка