Што да изберете кога ве фаќа глад меѓу оброците?
Исхраната игра клучна улога во одржувањето на здравјето и добрата физичка состојба. Иако многумина избегнуваат ужинки помеѓу главните оброци од страв дека ќе се здебелат, постојат намирници кои може да се консумираат без грижа на совест – а притоа да придонесат за чувство на ситост и подобар метаболизам.
Зеленчукот на прво место
Зеленчуковите салати како зелка, спанаќ, брокула и карфиол се одличен избор. Тие се нискокалорични, богати со влакна и хранливи материи, и помагаат во контролирање на апетитот.
Семки за енергија и ситост
Семките од тиква и сончоглед се уште една здрава опција. Лесни се за комбинирање со салати, смути или житни појадоци, а содржат здрави масти, витамини и минерали. Дополнително, нивната текстура и вкус ги прават совршени како засебна ужинка.
Пуканки – здрава верзија на омилените грицки
Ако се подготвени без масло, путер или сол во вишок, пуканките можат да бидат здрав избор. Тие се богати со растителни влакна и имаат малку калории, што ги прави одлични за грицкање меѓу оброците.
Освежителни овошни сладоледи
За љубителите на благо, овошните сладоледи без додаден шеќер се здрава алтернатива на класичните десерти. Тие го задоволуваат апетитот за нешто слатко, а притоа не го нарушуваат балансот во исхраната.
Темно чоколадо – задоволство со мерка
Темното чоколадо со висока содржина на какао е уште една добра опција. Консумирано умерено, тоа ја намалува желбата за други слатки, а благодарение на антиоксидансите и добрите масти, има и позитивен ефект врз расположението и апетитот.
Вклучувањето на овие намирници во секојдневната исхрана може да помогне во контролирање на телесната тежина и да придонесе кон подобро здравје – без чувство на вина и без непотребни калории.
