Пенс остро против Трамп: „Путин не сака мир – ја сака Украина“
Поранешниот потпретседател на САД, Мајк Пенс, во интервју за CNN изјави дека рускиот претседател Владимир Путин не бара мир, туку целосна контрола над Украина. Со ова директно му противречи на својот поранешен шеф Доналд Трамп, кој во повеќе наврати го тврдеше спротивното.
Пенс даде интервју по добивањето на наградата за храброст „Џон Ф. Кенеди“, за неговото одбивање да му попушти на Трамп и да ги оспори резултатите од изборите во 2020 година. Тој потсети дека токму неговата решителност да ја потврди победата на Џо Бајден довела до насилниот напад врз Конгресот на 6 јануари 2021 година, за време на кој демонстрантите извикувале „обесете го Мајк Пенс“.
Пенс жестоко го критикуваше Трамп и поради најавената амнестија за околу 1.600 учесници во нападот врз Капитол, нарекувајќи ја таа одлука „длабоко разочарувачка“ и „погрешен сигнал“.
Тој остро се осврна и на економските политики на Трамп, посебно на трговските царини. Според Пенс, тие ќе доведат до „ценовен шок“, инфлација и потенцијален недостаток на производи, посочувајќи дека дури и администрацијата признала можни негативни последици.
„Оваа индустриска политика им наштетува на потрошувачите и ја загрозува американската економија“, рече Пенс, алудирајќи на изјавата на Трамп дека „американските деца ќе имаат две кукли наместо триесет – и тие ќе чинат неколку долари повеќе“.
Тој ја обвини актуелната администрација и за недоследност во поддршката кон Украина, предупредувајќи дека ваквиот однос само ја охрабрува Русија. „Ако нешто научивме последниве три години, тоа е дека Путин не сака преговори – тој ја сака Украина“, изјави Пенс.
Поранешниот потпретседател не го поштеди Трамп ни за ставот кон Канада, земја со која Трамп воведе царини и изјави дека би сакал да ја претвори во 51. држава на САД. Пенс, напротив, ја нарече Канада „вистински сојузник што со децении гине рамо до рамо со САД“.
