Шпанската влада денеска го утврди предлог-законот за намалување на стандардната работна недела од досегашните 40 на 37,5 работни часа, со што би се модернизирал пазарот на труд и би се подобрил квалитетот на животот на вработените.
Според Министерството за труд, оваа мерка ќе опфати околу 12,5 милиони работници во приватниот сектор, вклучувајќи и оние со полно и скратено работно време. Властите очекуваат дека скратувањето на работното време ќе резултира со зголемена продуктивност и намалување на отсуствата од работа.
„Денес го модернизираме светот на трудот и им помагаме на луѓето да бидат посреќни“, изјави министерката за труд Јоланда Диас.
Скратената работна недела веќе се применува во некои сектори и во јавната администрација, а според Диас, најмногу ќе имаат корист вработените во малопродажба, производство, угостителство и градежништво.
Иако иницијативата е поддржана од големите синдикати, деловните здруженија ја критикуваат, наведувајќи дека мерката може да предизвика тешкотии, особено за малите компании. Во парламентот, владејачката левичарска коалиција на премиерот Педро Санчез засега нема доволно гласови за да го изгласа предлогот.
Законот е поднесен од коалицијата Сумар, левичарскиот партнер во владата, а загриженост за неговото влијание врз малите бизниси и самовработените изрази и каталонската националистичка партија Јунтс, која повремено ја поддржува владината коалиција.
Шпанија ја воведе 40-часовната работна недела во 1983 година, кога работната недела беше скратена од 48 часа.
