Украинскиот претседател Володимир Зеленски денес изрази сочувство до семејствата на загинатите и повредените во последните руски напади и повика на поостри мерки против Русија, со цел да ѝ се одземат ресурсите за водење војна.
„Во текот на ноќта, Русија лансираше четири балистички ракети и 142 дронови“, напиша Зеленски на Икс, додавајќи дека десетици беспилотни летала сè уште кружат над Украина. Според него, Киев бил погоден двапати – прво со ракети, а потоа со дронови во утринските часови.
Екипите за итни интервенции веднаш се распоредиле на терен и им пружале помош на повредените. Засега има информации за седум повредени, од кои четири се деца. За жал, животот го загубија жена и нејзиниот син, за кои Зеленски упати искрено сочувство.
Тој информираше и за напади врз други региони – Запорожје, Донецк, Житомир, Херсон, Дњепар, а особено критична била ситуацијата во Сумската област, каде што додека траеле спасувачките операции, Русија продолжила со гранатирање.
Зеленски повтори дека само засилен меѓународен притисок и посериозни санкции можат да го отворат патот за мир и дипломатија. Побара конкретни чекори што ќе го ограничат пристапот на Русија до ресурси за водење војна и се заблагодари на сите партнери кои ја поддржуваат Украина, особено во зајакнувањето на воздушната одбрана.
Во нападот врз Киев синоќа, според извори блиски до градските власти, убиени се две лица. Градоначалникот Виталиј Кличко објави дека дрон погодил станбена зграда во Шевченковскиот реон и потврди дека вкупно седум лица се повредени, меѓу кои и четири деца.
