Редок морски феномен откриен во грчките крајбрежни води: Повторно се појави морската цветница
Институтот за заштита на морето „Архипелагос“ од Грција информираше за редок природен феномен кој неодамна бил забележан долж грчкото крајбрежје. Станува збор за невообичаено голема појава на плодови од ендемска морска трева, позната како морска цветница (Posidonia oceanica), која формира таканаречени „подводни ливади“.
Според научниците, оваа појава се случува многу ретко и последен пат е забележана во 2013 и 2023 година. Во последниве денови, граѓани и организации пријавиле големи количини од овие морски плодови распослани долж бреговите, што ги охрабрило експертите да ја истражат појавата подетално.
„Овој редок настан е резултат на цветање што се случи минатата есен. За негово појавување е потребна комбинација од комплексни и ретки природни услови“, наведуваат од Институтот. Морската цветница може да достигне висина до еден метар и има огромно значење за екосистемот, бидејќи создава средина погодна за развој на богат подводен живот.
Во претходните појави, научниците собрале над 12.000 плодови, кои биле искористени за експериментални подводни градини. Поради сложеноста и специфичноста на овој процес, слични обиди се ретки и на глобално ниво.
Од „Архипелагос“ потсетуваат дека „подводните ливади“ играат клучна улога во борбата против климатските промени, со способност да апсорбираат дури 35 пати повеќе јаглероден диоксид од тропските шуми. Освен тоа, тие се дом на преку 300 видови алги и повеќе од 1.000 видови морски животни, што ги прави исклучително важни за биолошката разновидност и одржливото рибарство.
