Република

ВО НЕГОТИНО Е ТРЕТИРАНО: Стручни лица ќе проверат од Кавадарци до Гевгелија дали се раширил отровниот плевел

Отровниот плевел Сребренолисен зрнец веќе е третиран во Неготино, но стручни лица од Здружението на граѓани Ековита од овој град, ќе работат во поширокиот регион, за да видат дали и таму е распространет. Повеќе активности на овој план најавуваат од идната недела.

Тој е опасен за животните и посевите и мора да се отстрани. Плевелот мора да го уништат стручни лица.

„Од следната недела очекуваме да почне да цвета бидејќи така најдобро се забележува, а поради ладното време се развлече периодот на цветање. Моментално е во вегетативна фаза. Само агроном или биолог може да го идентификува. Има зачетоци на цветови и очекуваме да се појави следната недела. Во расцветана фаза многу појасно ќе се наоѓа и тогаш граѓаните ќе можат да го откријат и тогаш може да почне кампањата, тогаш ќе можеме да ја испитаме целата рута од Гевгелија до Кавадарци. За жариштето во Неготино, физички е отстранет плевелот и испрскан со хербицид, додека второто жариште во Кавадарци доцни со вегетацијата и послабо се развива“, велат од Ековита.

По отстранување на минатогодишните суви изданоци на опасниот плевел Solanum elaeagnifolium, препознатлив по жолтите бобинки полни со семе, тимот на Ековита спроведе нова теренска акција насочена кон третман на младите изданоци во рана вегетативна фаза. Акцијата вклучуваше третирање со тотален хербицид во појасот од 1 метар од асфалтот на индустрискиот пат во Неготино, со цел уништување на надземните и подземните делови на плевелот, кој се размножува и преку семе и преку длабоки ризоми.

„Ваквиот пристап е неопходен бидејќи растението покажува висока регенеративна способност – дури и по косење или плитко вадење, се регенерира од остатокот на коренот. Целата операција беше спроведена под стручна контрола и менторство на проф. д-р Звонко Пацановски, експерт за инвазивни видови од Земјоделскиот факултет во Скопје. Според професорот, Solanum elaeagnifolium е еден од најопасните инвазивни плевели во регионот, со висок ризик за добитокот и земјоделските култури, поради присуството на токсични гликоалкалоиди – соланин. Третирањето на жариштето во Неготино го изврши дипл. инж. агроном Кристина Тодорова, проектен координатор на „Екомисија“, со примена на методологија препорачана од професорот – вклучувајќи внимателно набљудување на фазата на развој, избор на соодветен препарат и безбеден третман. Очекуваме во наредниот период растението да влезе во фаза на цветање, што значително ќе ја олесни неговата визуелна идентификација – благодарение на карактеристичните виолетови цветови. Оваа фаза е клучна за ефикасно мапирање на нови жаришта и навремено уништување, пред да започне формирање на плодови и ширење на семе“, вели агроном Кристина Тодорова, проектен координатор на „Екомисија“.

Растението кое потекнува од Америка е отпорно на суша, има способност за брзо ширење преку ветер, вода, или слеп патник залепен на тркала на шлеперите.

„Професорот д-р Звонко Пацановски предупредува дека третманот мора да се спроведе пред фазата на зреење за да се намали ризикот од ново ширење. Следува мониторинг и мапирање на поширокиот регион од Кавадарци до Гевгелија, каде што според теренските индиции се можни нови жаришта. Кога ќе расцвета, ќе следи апел до граѓаните доколку го забележат веднаш да не информираат во Ековита. Заедно да го спречиме ширењето на овој плевел. На 13 мај во Неготино ќе се одржи завршен настан на проектот Екомисија каде ќе се прикажат досегашните резултати од акцијата за уништување на овој отровен плевел“, информира Тодорова.

Овие активности се дел од проектот „Граѓанските организации во акција за климатска промена“, кој го имплементира Еко-свест, со финансиска поддршка од Шведска.

Овој плевел ги загрозува тревопасните животни, односно растението е отровно за добитокот, а неговите алкалоиди можат да предизвикаат невролошки нарушувања, и во крајна линија и смрт. Го уништува земјоделството така што брзо се шири и ги задушува локалните култури. Растението е отпорно на суша и неповолни услови, а неговото семе може да се разнесува преку ветер, вода и возила.

Извор: faktor.mk

Република

Проданоски: Откупот на тутун во Прилеп покажува позитивен сигнал за производителите

Денес, заедно со министерот за земјоделство, шумарство и водостопанство, Цветан Трипуновски, градоначалникот на Прилеп, Дејан Проданоски, ја посети откупната станица на Тутунскиот комбинат – Прилеп за да се информира за текот на откупот на тутунот во прилепскиот регион.

„Тутунопроизводството е длабоко вкоренето во нашата традиција и претставува силен столб на локалната економија. Прилепскиот регион води по производство на оваа стратешка култура, а повеќе од половина од тутунопроизводителите се токму од овој регион“, изјави Проданоски.

Градоначалникот додаде дека локалната самоуправа и државните институции ќе продолжат да го следат откупот и да се залагаат за фер вреднување на трудот на тутунопроизводителите. „Нашата цел е да ја зајакнеме економската стабилност на Прилеп и да обезбедиме сигурна иднина за сите наши производители, кои се еден од најзначајните носители на локалната економија“, истакна Проданоски.

Според податоците на Државниот инспекторат за земјоделство, досега се откупени над еден милион килограми тутун, со просечна откупна цена од 419 денари за килограм, што е за речиси 20 денари повеќе во споредба со минатата година. Градоначалникот оцени дека ова е позитивен сигнал и додаде дека продолжуваат заложбите вредниот труд на производителите да биде правилно и достоинствено награден.

Република

Врачене наградите за најдобрите волонтери во Битола

5-ти декември е Меѓународниот ден на волонтерите и на овој ден секоја година се доделуваат наградите за најдобри волонтери кои со своите активности и ангажмани го поттикнуваат и промовираат волонтерството во Битола.
Целта е да се зголеми видливоста на волонтерите и позитивните волонтерски практики и да инспирира понатамошно унапредување и развој на волонтерството на локално ниво. Наградата е од големо значење за признавање на граѓанскиот ангажман во подобрување на животот во локалната заедница.

Локалниот совет за волонтерство на општина Битола (ЛСВ), ја додели наградата за волонтерски ангажман во локалната заедница за 2025 година на Доброволно противпожарно друштво „Архангел“ – Битола, иницијативата „ЕкоРозе“, иницијатива „Волонтерско цртање во Зоолошка градина“, Јулијана Делев и Лина Чашитовска.

Наградите ги додели градоначалникот на Битола, Тони Коњановски, кој им честиташе за нивниот волонтерски ангажман и посветеност кон заедницата во која што живеат, за изразената солидарност и активен придонесе кон решавање на проблемите во локалната средина.

А награде се:
-Доброволно противпожарно друштво „Архангел“ – Битола се наградува за својот волонтерски ангажман со редовно учествување во акции за помош на населението при поплави, временски непогоди и ризични ситуации, поддршка на заедницата преку јавни кампањи за безбедност, превенција од пожари на отворен простор. А, со тоа нивната волонтерска активност директно се одразува врз безбедноста и подготвеноста на Општина Битола.

-Од иницијативата „ЕкоРозе“ се наградува тимот ученици Изабела Шишковска, Бојан Нацов и Андреа Трајковска под менторство на проф. Соња Карапашовска за својот волонтерски труд за иницијативатата „ЕкоРозе“ за воспоставување систем за селекција и рециклирање на текстилниот отпад.

Иницијативата „Волонтерско цртање во Зоолошка градина“ за волонтерска активност реализирана од ученици од ООУ „Елпида Караманди“ и нивната наставничка Славица Маркоска за време на летниот распуст, во периодот од јуни до септември со цел да се поттикне креативноста, љубовта кон животните и еколошката свест кај младите. Учениците волонтерски учествуваа во сликање на мурал во зоолошката градина.

-Јулијана Делев се наградува за волонтерската организација на настанот „Хуманитарна вечер со македонски автори“ кој се реализираше по трет пат во 2025 година. Целта на настанот беше забава и дружење и запознавање на гостите со македонски автори чии книги можеа да ги купат на самиот настан, како и други книги кои беа обезбедени од страна на организаторот. Собраните средства беа искористени за купување на школски прибор како и други потребни работи за почетокот на учебната година за дечиња со посебни потреби.

-Лина Чашитовска се наградува за нејзиниот двегодишен ангажман како Лидер на Клубот на млади, кој беше организатор на најголем дел од настаните за волонтирање на младите на ОО Црвен крст – Битола.

На јавниот повик кој беше објавен право да номинираат кандидати имаа организации, институции, неформални групи и други организатори на волонтерска работа.

Република

Македонското знаме изоставено на прославата на албанското знаме во Струга – инспекцијата покренува постапка

Општина Струга и едно одговорно лице се најдоа на тапет. Во вистинска правна драма, полицијата поднесе барање за поведување прекршочна постапка против локалната самоуправа и 65-годишниот М.Ќ. од Биџево, поради прекршување на законот за употреба на знамињата.

Пропустот се случил за време на прославата на Денот на албанското знаме на 28 ноември 2025 година. Според наводите на МВР, организаторите – Општина Струга и М.Ќ. – тотално ја игнорирале законската обврска. Иако на настанот, кој што се одржувал на главната улица „Маршал Тито“, било истакнато знамето на заедниците, државното знаме на Република Македонија било целосно изоставено!

Клучната бина и дел од кејот на Црн Дрим, кои беа централни точки на прославата, останале без македонскиот симбол.

„ОВР Струга поднесе барање за поведување прекршочна постапка против правното лице-општина Струга и против одговорното лице М.Ќ. (65) … поради сторено дело спротивно на член 6, а казнивo по член 11 од Закон за употреба на знамиња на заедниците во Р. Македонија“, изјавија од МВР.

Ова непочитување на државните симболи сега ќе добие судски епилог.