Скопје

Ѓорѓиевски: Скопје е запуштено, но можеме заедно да го промениме

Градоначалникот на општина Кисела Вода, Орце Ѓорѓиевски, денеска од Скопскиот Аквадукт испрати силна порака за јавна хигиена, системска грижа и општествена одговорност, учествувајќи во националната акција за чистење „Generalka Weekend 25“.

„Скопје никогаш не било во полоша состојба кога станува збор за јавната хигиена“, истакна Ѓорѓиевски, потенцирајќи дека запуштеноста, дивите депонии и недостатокот на системски однос кон животната средина се слика на долгогодишна негрижа, за која институциите молчат или не дејствуваат. Тој директно ја обвини градоначалничката на Скопје дека не ја извршува својата работа.

Акцијата кај Скопскиот Аквадукт се одржа со учество на бројни јавни личности и институции, меѓу кои и претседателката на државата Гордана Силјановска Давкова, вицепремиерот Изет Меџити, австрискиот амбасадор Мартин Памер, министерката за образование Весна Јаневска и пратеникот Висар Ганиу. Ѓорѓиевски, како претседател на ЗЕЛС, изрази поддршка за иницијативата организирана од здружението „Мен енд Маунтин“, потенцирајќи дека чистата животна средина не е луксуз, туку предуслов за достоинствен живот.

„Денешната акција не е само чистење отпад, туку и враќање на вредностите и вниманието кон јавниот простор, кој ни припаѓа на сите“, рече Ѓорѓиевски, посочувајќи дека во Кисела Вода во изминатите три и пол години се расчистени 157 диви депонии, со редовни акции за чистење и вклучување на целата заедница – од администрацијата до учениците.

Според него, „Generalka Weekend“ треба да биде потсетник дека со здружена акција може да се направат вистински и опипливи промени, но дека вистинскиот предизвик започнува по завршувањето на ваквите настани.

„Денес чистиме, но од утре – бараме континуитет, системска грижа и одговорност!“, порача Ѓорѓиевски.

Скопје

Меџити: Образованието на мајчин јазик е темел на еднаквост и соживот

Денеска беше одбележан Денот на турското образование, во организација на Основното училиште Тефејјуз, институција со долга традиција во образованието на мајчин јазик. Настанот беше посветен на значењето на турското образование во Северна Македонија, неговата улога во зачувувањето на културниот идентитет, како и на континуираниот придонес на турската заедница во образовниот и општествениот живот.

Градоначалникот на Чаир, Изет Меџити истакна дека ваквите настани ја потврдуваат вредноста на образованието на мајчин јазик како клучен елемент за почит, еднаквост и соживот во мултиетничкото општество. Тој нагласи дека институционалната поддршка за образованието на мајчин јазик останува јасна и недвосмислена заложба.

Според Меџити, почитувањето и унапредувањето на образованието на мајчин јазик за сите заедници претставува основа за еднаквост, општествена кохезија и градење инклузивно општество во кое секој граѓанин има еднакви можности.

Скопје

Активирани алармантни мерки во Скопје – газдите треба да ги ослободат од работа следниве категории на лица

Министерството за животна средина и просторно планирање информира дека според податоците од Државниот автоматски мониторинг систем за квалитет на амбиенталниот воздух и добиената временска прогноза од Управата за хидрометеоролошки работи, прагот на алармирање на суспендирани честички со големина до 10 микрометри (надминување на вредноста од 150 mg /m3 во текот на два последователни денови) е надминат на мерните места во Скопје – Центар, Гази Баба, Карпош, Лисиче и Ректорат.

Прагот на алармирање е дефиниран во Уредбата за изменување и дополнување на Уредбата за гранични вредности за нивоа и видови на загадувачки супстанции во амбиенталниот воздух и прагови на алармирање, рокови за постигнување на граничните вредности, маргини на толеранција за гранична вредност, целни вредности и долгорочни цели (Службен весник на Република Македонија бр. 183 од 14.12.2017 година).

Во табелата се прикажани среднодневните концентрации на PM10 на мернoто место и деновите каде има појава на надминување на праг на алармирање.

Согласно настанатата состојба за мерните места во Скопје – Центар, Гази Баба, Карпош, Лисиче и Ректорат важат следните мерки:

Да се интензивираат вонредните инспекциски надзори на инсталациите со А-Интегрирана еколошка дозвола

Да се интензивираат вонредните инспекциски надзори на терен за контрола на инсталациите со Б-Интегрирани еколошки дозволи и Елаборати

Инсталациите со континуиран мониторинг да овозможат јавен пристап на измерените податоци

Да се интензивираат вонредните контроли на техничката исправност на возилата, особено оние со дизел горива и нерегистрирани возила

Да се интензивираат вонредните контроли на градилиштата

Забрана на горење на отворено

Се препорачува на сите правни субјекти (работодавци) да ги ослободат од работни обврски бремените жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар

Се препорачува на сите правни субјекти (работодавци) да го реорганизираат работното време и лицата кои работат на отворено да работат од 11.00 до 17.00 часот

Се препорачува да не се организираат спортски натпревари и други културни манифестации на отворено.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.