Скопје

Ѓорѓиевски: Вечна слава за Љубиша Аранѓеловиќ – херојот од Диво Насеље

Со силна емотивна порака и длабоко чувство на почит, градоначалникот на Кисела Вода, Орце Ѓорѓиевски, денеска им оддаде чест на паднатите херои од настаните во Диво Насеље, посебно потсетувајќи на херојството на Љубиша Аранѓеловиќ, припадник на Единицата за брзо распоредување, кој го загуби животот бранејќи ја Македонија.

Свечена церемонија се одржа пред спомен-бистата на Аранѓеловиќ, поставена минатата година во негова чест. На настанот присуствуваа и неговото семејство, директорот на Бирото за јавна безбедност Александар Јанев, колеги од ЕБР и претставници од Синдикатот на полицијата.

„Тој го даде својот живот за нашата безбедност, за нашата татковина. Тоа е жртва која никогаш нема да ја заборавиме. Бистата што ја поставивме е симбол на нашата благодарност, но и историски потсетник за времињата на искушенија низ кои помина Македонија,“ истакна Ѓорѓиевски.

Градоначалникот нагласи дека должност на сите е да го чуваме споменот на ваквите херои, да го пренесуваме нивното дело на идните генерации и да ги негуваме вредностите за кои тие се бореа.

Ѓорѓиевски заврши со зборови полни емоција: „Љубиша остави семејство и внуци кои никогаш нема да го запознаат, но ќе знаат дека нивниот татко и дедо бил херој кој никогаш не ја изневери татковината. Вечна ти слава брате, и нека им е вечен спомен на сите македонски синови кои животот го положија пред олтарот на татковината.“

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.