Високата претставничка на ЕУ за надворешна политика и безбедност, Каја Калас, денеска од украинскиот град Лавов соопшти дека Европската Унија ќе обезбеди една милијарда евра поддршка за украинската воена индустрија. Средствата потекнуваат од каматата на руските средства замрзнати во ЕУ по почетокот на руската инвазија врз Украина во 2022 година.
„Само што одблокиравме една милијарда евра за украинската одбранбена индустрија, со цел Украина поефикасно да се брани“, изјави Калас за време на заедничката посета на Украина од страна на повеќе европски министри.
Западот замрзна околу 235 милијарди евра руски државни средства, а Европската Унија во март одлучи каматата од тие средства да ја насочи кон поддршка на Украина. Москва остро реагираше, нарекувајќи го овој потег „кражба“.
Францускиот министер за надворешни работи, Жан-Ноел Баро, исто така присуствуваше на средбата во Лавов и најави дека Франција ќе искористи дел од овие средства за одржување и сервисирање на својата воена опрема, вклучително и топовите „Цезар“, кои се веќе во употреба од страна на украинските сили.
Овој потег доаѓа во време кога Европа се обидува да ја засили својата поддршка за Киев, особено по враќањето на Доналд Трамп во Белата куќа. Новата администрација во Вашингтон го ревидира пристапот кон помошта за Украина, откако Трамп остро ја критикуваше обемната финансиска поддршка што неговиот претходник, Џо Бајден, ѝ ја додели на Киев.
