Македонските инженери бараат одговорност за 56 милиони евра

Во емисијата „Аргумент плус“ министерката за енергетика, Сања Божиновска, меѓу другото, изјави: „Кога дојдов, најдов само фактура која што е изготвена врз основа на договор каде што нашата држава има закупено долгогодишен капацитет од 15 години и таа фактура месечно изнесува 300.000 евра за закуп на преносен капацитет. Тоа не се користи… Сме закупиле капацитет за пренос и тој не се користи, сега за сега ги плаќаме месечно овие 300.000 евра. Нив ги плаќаме веќе една година сигурно, а ќе ги плаќаме 15 години. Тоа е сериозен договор потпишан на 15 години. Парите ги даваме на тој што го продава капацитетот – на систем операторот. Мислам дека не може да се раскине овој договор. Тие што го правеле договорот можат да појаснат што мислеле тогаш со закуп на овој капацитет…“
Според кажаното, државата веќе една година плаќа по 300.000 евра месечно за закуп на преносен капацитет од 1,8 TWh годишно. Се работи за закуп на правото на користење на дел од гасоводната мрежа за транспорт на природен гас во период од 15 години, а кој капацитет не се користи. Ова значи дека досега се потрошени најмалку 3,6 милиони евра, со обврска да се исплатат вкупно 54 милиони евра во наредните години, притоа без било каква јасна правна, енергетска или економска оправданост.
Инженерите на Република Македонија бараат обвинителството да отвори предмет и да ја информира јавноста дали и какви дејствија се преземаат за утврдување на евентуална одговорност на надлежните лица кои го склучиле договорот, како и на оние кои знаеле, а не пријавиле.

Странски „хај-тек“ инвестиции од Германија и Турција: 80 милиони евра и илјада нови работни места

Македонската економија влегува во нова фаза на развој со најавата за две значајни странски инвестиции во областа на високата технологија. Премиерот Христијан Мицкоски соопшти дека германска и турска компанија ќе инвестираат околу 80 милиони евра, носејќи свеж капитал надвор од досега доминантната автомобилска индустрија.

Според најавите, двата проекта ќе имаат силен извозен карактер и значајна додадена вредност. Се очекува годишен извоз од над 200 милиони евра, како и отворање на приближно 1.000 нови работни места, главно во сегментот на високо квалификуван кадар.

Мицкоски истакна дека ваквите инвестиции го потврдуваат стратешкото насочување на државата кон високо-технолошки индустрии, со цел диверзификација на економијата и намалување на зависноста од еден сектор. Тој изрази оптимизам дека до крајот на годината ќе следат уште нови странски вложувања.

Најавените проекти се оценуваат како јасен сигнал за подобрена инвестициска клима и дел од пошироките напори за привлекување современи технологии, повисоки плати и одржлив економски раст.

Економија

Димитриеска – Кочоска: 97 милиони евра за клучни енергетски проекти

Денеска беа потпишани договори за државна гаранција и заеми во вкупна вредност од 97 милиони евра, со кои ќе се реализираат стратешки енергетски проекти што значително ќе ја променат енергетската слика на државата.

Министерството за финансии, преку издавање државна гаранција, овозможи финансирање од 87 милиони евра за проектот „Фотонапонска електроцентрала Битола 3“. Од оваа сума, 50 милиони евра се обезбедени од КфВ, а 37 милиони евра од Европската банка за обнова и развој. Дополнително, обезбедени се и 10 милиони евра за ревитализација на хидроелектраните.

Министерката за финансии Гордана Димитриеска – Кочоска изрази благодарност до меѓународните финансиски институции за континуираната поддршка, како и до тимот на АД ЕСМ за нивната посветеност во реализацијата на проектите.

Според неа, овие капитални инвестиции ќе придонесат за зајакнување на домашното производство на електрична енергија, ќе обезбедат посигурно и постабилно снабдување и ќе дадат силен поттик за економска стабилност и одржлив развој на државата.

Економија

Божиновска: Нема енергетска криза, државата има резерви од мазут!

Граѓаните нема да почувствуваат никакви прекини во снабдувањето со топлинска енергија, иако ЕСМ побара прогласување кризна состојба. Министерката за енергетика, Сања Божиновска, денеска на брифинг со новинарите порача дека државата има доволно резерви на мазут за да ги покрие потребите.

Барањето за кризна состојба ќе се разгледува на утрешната владина седница, но Божиновска нагласи дека тоа е технички чекор за да се активираат државните резерви. Причина за ова е триесетдневната неможност за редовна набавка на мазут од Грција поради тамошните протести.

„Нема да има никаква криза. Постои мазут во државата – ако не го земат од Грција, ЕСМ ќе го земе од државните резерви. За граѓаните ова нема да значи апсолутно ништо“, истакна министерката.