Путин предлага директни мировни преговори со Украина на 15 мај во Истанбул
Рускиот претседател Владимир Путин предложи одржување директни преговори меѓу Русија и Украина на 15 мај во Истанбул, без поставување предуслови. Претседателот го соопшти предлогот на прес-конференција, нагласувајќи дека разговорите треба да продолжат таму каде што беа прекинати во 2022 година. „Предлагаме властите во Киев да ги продолжат преговорите што ги прекинаа. Предлагаме тие да започнат во четврток, 15 мај, во Истанбул“, изјави Путин, додавајќи дека ќе се обрати до турскиот претседател Реџеп Таип Ердоган за да помогне со организацијата на средбата.
Предлогот на Кремљ доаѓа во време кога украинскиот претседател Володимир Зеленски, заедно со неколку европски лидери, предложија воведување 30-дневно примирје како можност за деескалација на конфликтот. Повикот за нова дипломатска иницијатива се совпадна со комеморациите по повод 80-годишнината од победата над фашизмот, што оваа недела се одбележува во Москва со традиционална воена парада по повод Денот на победата во Втората светска војна.
На иницијативата на Путин реагираше и американскиот претседател Доналд Трамп, кој преку својата социјална мрежа Truth Social ја поздрави можноста за директен дијалог, нарекувајќи го 15 мај „голем ден за Русија и Украина“. Трамп изрази надеж дека доколку се постигне мир, ќе бидат спасени стотици илјади животи, оценувајќи дека тоа може да доведе до „сосема нов и многу подобар свет“. Тој најави дека активно ќе се вклучи во мировниот процес и ќе работи со двете страни за ставање крај на војната, додавајќи дека „доаѓа голема недела“ за мировните напори.
