Иако стареењето е неизбежно, многу луѓе – дури 54 проценти – сонуваат да доживеат до сто години. Според експертите, таа цел не мора да бара скапи третмани или специјални медицински процедури. Специјалистот и професор по геријатрија, д-р Наушир Пандја, и геријатрискиот лекар, д-р Гари Смол, велат дека тајната на долговечноста често се крие во секојдневните навики – особено во тоа како го започнуваме денот.
Ова се пет заеднички утрински навики на луѓето кои доживуваат длабока старост:
1. Стануваат рано
Луѓето кои живеат долго најчесто се будат рано – со изгрејсонцето – но затоа си легнуваат порано и секоја ноќ спијат од седум до девет часа.
„Спиењето е исклучително важно, особено кај повозрасните луѓе“, вели д-р Пандја. Д-р Смол дополнува дека за време на спиењето, мозокот се прочистува од штетни наслаги, вклучувајќи го и амилоидот – протеин поврзан со развој на Алцхајмерова болест.
2. Го започнуваат денот со вода
Многу стогодишници првото нешто што го прават наутро е пиење вода – најчесто топла или со лимон. „Тие се особено внимателни со хидратацијата“, вели д-р Пандја.
Добрата хидратација го поддржува здравјето на срцето и белите дробови, а истовремено го успорува биолошкото стареење.
3. Одвојуваат време за тишина и размислување
Наместо веднаш да ги проверуваат мобилните телефони или да влегуваат во дневниот хаос, овие луѓе одвојуваат неколку минути за себе – било преку молитва, медитација или тивко размислување.
„Тоа е момент за смирување на умот и телото пред да се фрлите во обврските“, вели д-р Пандја.
4. Се движат веднаш по будењето
Активноста веднаш по станување е исто така карактеристична. Некои седат во двор наутро, други се истегнуваат, а многумина се решаваат за лесна прошетка.
„Прошетката со пријател е идеална – движењето во комбинација со разговор го стимулира мозокот и го намалува стресот“, советува д-р Смол.
5. Генетиката не е сè
Иако генетиката има влијание, таа не е пресудна.
„Приближно една третина од долговечноста зависи од гените“, вели д-р Пандја. „Но, многу поважно е како живееме – навиките, околината и начинот на размислување се фактори што можеме да ги контролираме и со кои можеме значително да влијаеме врз нашата здравствена состојба и животниот век.“
