Климатската криза ја загрозува иднината на бананите – најпопуларното овошје на светот
Гватемала/Костарика/Колумбија – Растечките температури, екстремните временски услови и климатски поврзаните штетници сериозно ги погодуваат земјите производители на банани како Гватемала, Костарика и Колумбија, предупредуваат најновите истражувања. Според извештајот на Christian Aid, насловен „Going Bananas: How Climate Change Threatens the World’s Most Popular Fruit“, скоро две третини од земјоделските површини наменети за одгледување банани во Латинска Америка и на Карибите ќе станат непогодни за оваа култура до 2080 година.
Бананата е најчесто консумираното овошје во светот и четврта најважна прехранбена култура по пченицата, оризот и пченката. Околу 80% од светското производство е наменето за локална потрошувачка, а повеќе од 400 милиони луѓе обезбедуваат меѓу 15 и 27 проценти од дневниот калориски внес токму преку ова овошје. Над 80% од извозот на банани што завршува на полиците на супермаркетите ширум светот потекнува токму од Латинска Америка и Карибите – региони кои сè почесто се соочуваат со климатски катастрофи и нестабилни временски услови, известува Heute.
Земјоделците се соочуваат со сериозна егзистенцијална криза. „Климатските промени ги уништија нашите насади. Тоа значи дека немаме приходи, бидејќи нема што да продаваме. Мојата плантажа умира. Тоа е смрт“, изјавила за истражувачите Аурелија Поп Хо (53), одгледувачка на банани од Гватемала.
Најшироко застапената сорта – Кавендиш – е особено ранлива. За оптимален раст, ѝ се потребни температури помеѓу 15 и 35 степени Целзиусови, како и доволно вода – но не премногу. Оваа сорта е многу чувствителна на бури, кои може да доведат до опаѓање на листовите – процес што ја нарушува фотосинтезата, а со тоа и опстанокот на растението. Иако постојат стотици видови банани, Кавендиш е доминантна во глобалниот извоз поради нејзиниот вкус и висок принос. Сепак, токму недостатокот на генетска разновидност ја прави оваа сорта особено подложна на климатските промени.
Климатската криза веќе ги намалува приносите низ целиот регион, а експертите предупредуваат дека без итна адаптација и поддршка за земјоделците, светската понуда на банани може да се најде во сериозна опасност во наредните децении.
