Истанбул во фокусот на светската дипломатија: Се подготвува нова рунда мировни преговори меѓу Русија и Украина
По повеќе рунди дипломатски обиди во главните градови на завојуваните страни – Москва и Киев – како и во Вашингтон, Ријад и низ Европа, вниманието на меѓународната јавност сега се насочува кон Истанбул. Таму се очекува можно продолжување на мировните преговори со цел ставање крај на тригодишната руска инвазија врз Украина.
Рускиот претседател Владимир Путин во четвртокот предложи обновување на директните преговори со Украина токму во Истанбул – град што симболично ги поврзува Азија и Европа. Претседателот на Украина, Володимир Зеленски, јавно го повика Путин на лична средба на турска територија.
Кој ќе учествува во преговорите?
Сѐ уште е неизвесно кој ќе ги претставува страните на средбата. Кремљ досега нема официјално потврдено дали Путин ќе присуствува, ниту кој би можел да ја предводи руската делегација. Советникот на украинскиот претседател, Михајло Подољак, изјави дека Зеленски ќе се сретне само со рускиот лидер.
„Ако Путин не се појави и се обидува да игра игри, тоа ќе биде конечен доказ дека не сака крај на војната“, изјави Зеленски во вторникот.
Весникот Вашингтон пост повикувајќи се на поранешен висок функционер од Кремљ, објави дека Русија на средбата во Истанбул ќе ја претставуваат министерот за надворешни работи Сергеј Лавров и советникот на претседателот за надворешна политика, Јуриј Ушаков. Изворот побарал анонимност поради чувствителноста на темата.
Зеленски најави дека ќе отпатува во Анкара, каде ќе се сретне со турскиот претседател Реџеп Таип Ердоган. Ако Путин одлучи да се појави во Истанбул, и Зеленски и Ердоган ќе заминат таму за заедничка средба.
Во случај Путин да не присуствува, Зеленски порача дека западните лидери – особено од Европа и САД – треба да ги засилат санкциите кон Русија.
