Скопје

Ѓорѓиевски: Интензивна акција за уредување на зеленилото во Кисела Вода

Општина Кисела Вода започна голема акција за уредување на зелените површини низ целата своја територија, информира градоначалникот Орце Ѓорѓиевски. Во активностите се вклучени сите сезонски работници, кои со механизација работат на косење и средување на парковите, трим патеките и детските игралишта.

„Работиме интензивно на терен. Денеска се фокусираме на трим патеката која е многу посетена поради убавото време, како и на поголемите паркови и јавни површини“, изјави Ѓорѓиевски.

Паралелно со косењето, патеките се мијат со специјално возило за да се одржува хигиената и да се обезбеди подобро корисничко искуство за граѓаните.

Акцијата ќе продолжи и во наредните денови, при што ќе бидат опфатени сите месни и урбани заедници. Се работи за редовна активност која се засилува во периодите кога временските услови доведуваат до побрз раст на вегетацијата.

„Зелените и чисти површини не се само визуелно значајни, туку се и клучен дел од здрава и квалитетна животна средина. Ќе продолжиме со вакви координирани акции и во иднина“, порача градоначалникот Ѓорѓиевски.

Скопје

Скопската железничка станица се враќа во живот по две децении

Еден од приоритетите на новата влада е вложувањето во инфраструктурата, вклучително и железничкиот сообраќај, како товарен така и патнички. Покрај набавката на нови локомотиви и вагони, значајна инвестиција е обновата на железничката станица во Скопје, која ќе ја врати својата функција од пред 15-20 години, кога објектот се руинираше и стана нефункционален.

Почна чистењето и средувањето на станицата, информираше директорот на Железница Инфраструктура, Синиша Ивановски. „Со цел враќање на автентичниот изглед на станицата, започнавме со отстранување на сите билборди, светлосни реклами и други информативни панели кои години наназад го нарушуваа изгледот на објектот“, напиша Ивановски на својата Фејсбук страница и им се заблагодари на компаниите кои се согласиле да ги тргнат билбордите.

Проектот ќе се реализира во фази и ќе заврши со генерално чистење на надворешниот изглед на станицата и поставување соодветна илуминација.

Скопје

Започна редизајнот на железничката станица во Скопје

Скопје – Почна чистењето и средувањето на железничката станица во Скопје, информираше директорот на Железница Инфраструктура, Синиша Ивановски.

„Со цел враќање на автентичниот изглед на станицата, започнавме со отстранување на сите билборди, светлосни реклами и други информативни панели кои години наназад го нарушуваа изгледот на објектот“, напиша Ивановски на својата Фејсбук страница. Тој им се заблагодари на компаниите кои се согласиле да ги тргнат билбордите.

Проектот ќе се одвива во фази и ќе заврши со генерално чистење на надворешниот изглед на станицата и поставување соодветна илуминација, посочи директорот.

Скопје

Голем дефект на „Крсте Мисирков“ – утре без вода клучни институции и делови од центарот на Скопје

Утре од 7 часот наутро значаен дел од централното градско подрачје ќе остане без вода поради дефект на водоводната линија на булевар „Крсте Мисирков“, соопшти ЈП „Водовод и канализација“ – Скопје.

Прекинот ќе ги опфати објектите на МАНУ, Основен суд 2, Младинскиот културен центар, Универзитетската библиотека „Св. Климент Охридски“, Универзитетот „Св. Кирил и Методиј“, трговскиот центар „Мавровка“, делови од Старата скопска чаршија, Саат-кулата, улицата „Отокар Кершовани“, Адвокатската улица и дел од булевар „Крсте Мисирков“.

Од претпријатието информираат дека екипите ќе работат интензивно на терен и дека водоснабдувањето ќе биде вратено веднаш по отстранување на дефектот.