Бројот на изгубени заби може да открие колку долго ќе живеете
Бројот на изгубени заби може да биде индикатор не само за општото здравје, туку и за потенцијалната должина на животот, како и за ризикот од одредени болести.
Истражување објавено во реномираниот магазин Periodontology 2000 покажало дека луѓето кои ги задржале сите свои заби до 74. година имаат поголеми шанси да доживеат 100 години. Спротивно на тоа, оние кои до 65. година изгубиле пет или повеќе заби, имаат зголемен ризик од сериозни здравствени проблеми, како што се кардиоваскуларни болести, дијабетес и остеопороза.
Според д-р Најџел Картер од Британското здружение за стоматолошко здравје, губењето заби може да биде резултат на стресни ситуации, лоша орална хигиена, воспалителни заболувања на непцата или пушење. Овие фактори се поврзани со зголемен ризик од срцеви болести и дијабетес.
Стручњаците препорачуваат редовно миење на забите двапати дневно со паста која содржи флуор, намалување на внесот на шеќери и редовни стоматолошки прегледи. Вниманието на здравјето на забите може да биде важен показател за општото здравје и потенцијалната должина на животот.
