Почина Ирис Бајло, поранешна новинарка и портпаролка на Градот Задар
Ирис Бајло, некогашна новинарка од Задар и поранешна портпаролка на Град Задар, е пронајдена мртва во нејзиниот стан во Загреб, објави Zadarski.hr повикувајќи се на неофицијални извори.
Веста за нејзината ненадејна смрт ја изненади јавноста, особено оние кои ја познаваа преку медиумите, градската администрација и деловните кругови. Засега причината за смртта не е официјално потврдена.
Од Полицијата на Загреб за Index.hr потврдиле дека смртта е евидентирана, но дека нема елементи на кривично дело. Неофицијално, блиски извори за порталот изјавиле дека сè уште не е јасно дали станува збор за несреќен случај или евентуално за самоубиство. Одговор на тоа прашање се очекува по обдукцијата.
Ирис Бајло беше позната во јавноста како професионална, елоквентна и дискретна личност. По успешната новинарска кариера, премина во јавната служба како портпаролка на Град Задар. Нејзината функција нагло заврши во средината на 2000-тите, откако јавноста дозна за нејзината врска со Новица Петраќ – син на контроверзниот бизнисмен Хрвоје Петраќ, кој своевремено беше осуден за киднапирање на синот на генерал Владимир Загорец.
По обелоденувањето на врската, Бајло беше разрешена од функцијата, но таа и Петраќ продолжија да бидат заедно и во 2009 година се венчаа. Заедно имаат две ќерки. По стапувањето во брак, Ирис целосно се повлече од јавниот живот и ѝ се посвети на семејството.
По образование, Бајло беше дипломиран новинар – завршила на Факултетот за политички науки во Загреб, каде што продолжила и со постдипломски студии. Тоа беше и една од причините за нејзиното преселување од Задар во главниот град.
Иако подолго време беше отсутна од медиумите, во 2016 година накратко ѝ се врати на јавноста како заштитно лице на грчкиот бренд за накит Oxette. Подоцна се насочи кон претприемништвото, лансирајќи луксузен козметички бренд на хрватскиот пазар.
Нејзината смрт се случува во период кога нејзиниот сопруг Новица Петраќ се наоѓа во фокусот на јавноста, поради сомнежи за поврзаност со криминална група инволвирана во набавка на медицинска опрема. Овие околности дополнително го зголемија интересот на јавноста за приватниот живот на семејството Петраќ, кој тие со години успешно го држеа подалеку од медиумското внимание.
