Свет

Серискиот убиец “Казанова” пред смртоносната инекција, упатил порака до претседателот Трамп: Неговите последни зборови го обиколија светот

Погубен серискиот убиец Глен Едвард Роџерс – последните зборови му беа посветени на Доналд Трамп

Серискиот убиец Глен Едвард Роџерс (62) е погубен со смртоносна инјекција во затворот во Флорида, поради бруталното убиство на Тина Мари Крибс, мајка на две деца, извршено во 1995 година. Последните зборови на Роџерс пред егзекуцијата беа посветени на американскиот претседател Доналд Трамп, кому му изрази поддршка.

„Претседателе Трамп, продолжете да ја правите Америка голема. Подготвен сум да заминам“, изјави Роџерс пред да му биде извршена казната, пренесува The New York Post.

Неговата изјава е јасна алузија на предизборниот слоган на Трамп – „Да ја направиме Америка повторно голема“ (Make America Great Again).

Погубувањето беше извршено во 18:16 часот, а според Tampa Bay Times, неговиот последен оброк се состоел од пица, чоколадна торта и газиран пијалак. Ова беше петтото погубување во државата Флорида годинава, додека следното е закажано за 10 јуни.

Роџерс, познат под прекарите „Казанова-убиец“ и „Убиецот од патот“, беше осуден за две убиства – на Тина Крибс и на Сандра Галагер, мајка на три деца, која исто така ја запознал во бар и ја убил три недели пред Крибс.

Во својата последна порака, Роџерс се заблагодари на сопругата за посетата истиот ден и упати мистериозна порака до семејствата на жртвите:

„Знам дека имате многу прашања. Ветувам дека наскоро ќе добиете одговори, и се надевам дека тоа ќе ви донесе барем малку мир.“

Роџерс долго време беше поврзуван со низа нерешени убиства, а во една прилика дури изјавил дека убил околу 70 луѓе – тврдење што подоцна го повлекол. Многу од неговите наводни или потврдени жртви биле жени со црвена коса, ситна градба и во триесеттите години од животот.

Во 2012 година беше емитуван документарен филм што го снимил неговиот брат, во кој се спомнуваше можноста Роџерс да бил вистинскиот убиец на Никол Браун Симпсон и нејзиниот пријател Рон Голдман – двојно убиство за кое беше обвинет, но и ослободен, поранешниот НФЛ играч О. Џ. Симпсон.

Сепак, полицијата во Лос Анџелес тогаш соопшти дека нема никакви докази кои би укажале дека Роџерс е поврзан со тие убиства што ја потресоа американската јавност.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.