ЕУ подготвува нов пакет санкции против Русија – на удар ќе бидат „Северен тек 1“ и „Северен тек 2“
Претседателката на Европската комисија, Урсула фон дер Лајен, денеска изјави дека Европската Унија подготвува нов, засилен пакет санкции против Русија, кој ќе ги опфати и гасоводите „Северен тек 1“ и „Северен тек 2“. Изјавата ја даде во пресрет на самитот на Европската политичка заедница што се одржува во Тирана.
„Рускиот претседател Владимир Путин повика на прекин на огнот за 9 Мај, но самиот никогаш не го испочитува тој повик. Потоа, Украина побара примирје, поддржано од Европската Унија и САД – повторно без одговор од Путин. И најпосле, Путин предложи директна средба со Украина во Турција. Претседателот Зеленски беше подготвен, но Путин никогаш не се појави“, нагласи фон дер Лајен.
Според неа, овие постапки јасно ја отсликуваат вистинската намера на рускиот претседател. „Затоа ќе го засилиме притисокот. Работиме на нов сет санкции кој ќе ги опфати ‘Северен тек 1’ и ‘Северен тек 2’, како и намалување на горната граница на цената на руската нафта. Дополнително, ќе следуваат и нови мерки против рускиот финансиски сектор“, изјави таа.
Фон дер Лајен подвлече дека Европската Унија останува посветена на мирот, но дека е неопходно зголемување на притисокот врз Кремљ.
Во истата насока се изјасни и високата претставничка на ЕУ за надворешна политика и безбедност, Каја Калас, која изјави дека Унијата веќе активно работи на следниот пакет рестриктивни мерки против Русија.
Самитот на Европската политичка заедница во Тирана ги обединува лидерите на сите 27 земји-членки на Европската Унија, како и 20 држави кои сè уште не се дел од блокот.
