Путин ги покани арапските лидери на првиот руско-арапски самит на 15 октомври
Рускиот претседател Владимир Путин ги повика лидерите на земјите-членки на Лигата на арапските држави, како и генералниот секретар на организацијата, да учествуваат на првиот руско-арапски самит, кој Русија планира да го одржи на 15 октомври.
Во телеграма објавена на официјалната веб-страница на Кремљ, Путин им се обрати на арапските лидери по повод отворањето на 34. самит на Арапската лига. Тој ја истакна посветеноста на Русија за продолжување на конструктивниот дијалог со Лигата, како и унапредување на пријателските односи со сите нејзини членки.
„Би сакал да ги поканам сите лидери на државите од вашето здружение, како и генералниот секретар, да учествуваат на првиот руско-арапски самит, кој планираме да го одржиме на 15 октомври“, се наведува во пораката на Путин.
Рускиот претседател изрази уверување дека самитот ќе придонесе за зајакнување на заемно корисната мултилатерална соработка меѓу Русија и арапскиот свет, како и за пронаоѓање решенија кои ќе обезбедат мир, безбедност и стабилност на Блискиот Исток и во Северна Африка.
Тој нагласи дека состанокот ќе се одржи во исклучително сложен геополитички момент – во сенка на ескалацијата на палестинско-израелскиот конфликт, кој, според него, веќе однел десетици илјади цивилни животи и довел до сериозни социјални и економски последици во регионот.
„Во вакви околности, улогата на Лигата на арапските држави како ефикасен механизам за мултилатерален дијалог и соработка станува сè поважна“, нагласи Путин.
Тој додаде дека Русија доследно ги поддржува колективните политички и дипломатски напори на арапските земји – како во рамки на самата Лига, така и преку други меѓународни формати – во насока на надминување на регионалните противречности.
Путин потенцираше дека сите спорови и конфликти треба да се решаваат согласно меѓународното право, со целосно почитување на суверенитетот и територијалниот интегритет на државите.
Во меѓувреме, денес во Багдад започна редовниот самит на Арапската лига, каде што, како и претходно, конфликтот во Појасот Газа е една од централните теми на дневниот ред.
