Република

Коњановски: Нова градинка во Битола — инвестиција во безбедна и светла иднина за нашите деца

Се финализира изградбата на новата детска градинка во просторот на поранешната касарна на АРМ во Битола, проект кој Општина Битола го реализира со посветеност и визија за иднината на најмладите. Градоначалникот Тони Коњановски денес изврши увид во тековните градежни активности, нагласувајќи дека станува збор за еден од клучните инфраструктурни зафати на општината.

„Градиме иднина за нашите деца. Ги надминавме сите затекнати предизвици и денес ја привршуваме изградбата на простор кој ќе згрижува 250 деца — безбеден, модерен и комплетно функционален,“ изјави Коњановски.

Проектот се реализира во неколку фази. Во првата, со вредност од 43,4 милиони денари, беше изградена карабината со целосно застаклување, вклучувајќи земјени, бетонски, армирачки и покривни работи. Дополнително, беше инвестирано и во изградба на дренажен систем вреден 4,75 милиони денари, за заштита на објектот од високи подземни води.

Во тек е втората фаза, вредна речиси 80 милиони денари, која опфаќа градежно-занаетчиски работи, инсталации, внатрешно уредување, партерно уредување и оградување на објектот.

Градоначалникот потенцираше дека паралелно со изградбата, се вложува и во зголемување на безбедноста во сите образовни институции. „Во соработка со Дирекцијата за заштита и спасување, интензивно спроведуваме контроли и преземаме мерки согласно добиените препораки, вклучително и дислокација на училници, со цел безбедна средина за децата,“ рече Коњановски.

Новата градинка е дел од пошироката стратегија на Општина Битола за развој на образовната и социјалната инфраструктура, со јасна цел: подобар живот за најмладите и сигурна иднина за сите граѓани.

Република

Утре две тетовски села ќе бидат без струја

Поради планирани технички зафати, утре (10 декември 2025) две села во тетовскиот регион ќе останат без електрична енергија во период од 09:00 до 14:00 часот.

Според најавата, прекин ќе има во делови од селото Џрпчиште, особено кај објектите што се наоѓаат во близина на млекарницата „Алпи“.

Исто така, без струја ќе бидат и делови од селото Теарце, поточно подрачјето во близина на полициската станица.

Од надлежните апелираат жителите да ги планираат своите активности согласно најавениот прекин.

Република

Јорданов со апел до граѓаните по вандализмот во центарот на Штип

Градоначалникот на Штип, Иван Јорданов, остро реагираше по серијата инциденти во централното градско подрачје, каде беа исечени новогодишни сијалици, уништени садници и оштетена урбана опрема. Тој оцени дека овие дејствија претставуваат сериозен удар врз заедничкото добро и вложувањата на општината.

„Сведоци сме на слики кои никој од нас не сака да ги види. Ваквите постапки не се само вандализам, туку ја нарушуваат сликата на градот и го поткопуваат трудот на сите кои работат за поуредено урбано окружување,“ истакна Јорданов.

Тој упати апел до СВР Штип да преземе мерки и санкции кон сторителите, потенцирајќи дека ваквото однесување ја загрозува безбедноста и ја понижува заедницата.

Јорданов ги повика и граѓаните на повисока свест и одговорност: „Нашиот град може да биде онаков каков што го посакуваме само ако секој од нас покаже грижа. Само заеднички можеме да го сочуваме јавниот простор и да создадеме средина во која сите се чувствуваме горди да живееме.“

„Нашиот град е наш дом и наша должност е да го чуваме,“ заклучи градоначалникот, охрабрувајќи ги жителите да реагираат доколку забележат уништување и да придонесат за заштита на градот.

Република

ЈП „Паркинзи“ го активира синџирот на пешачката зона во Битола

Битола, 9 декември 2025 – Јавното претпријатие „Паркинзи“ известува дека од утре повторно ќе се постави синџирот на улица „Рузвелтова“.

И покрај тоа што Советот на Општина Битола ја прогласи улицата за пешачка зона, несовесни возачи ја игнорираа сообраќајната сигнализација, што го направи неопходно повторното воведување на мерката за ограничување на сообраќајот.

ЈП „Паркинзи“ апелира до граѓаните да ги почитуваат правилата за да се овозможи безбедно движење на пешаците и одржување на редот на оваа прометна улица.