Македонија е на чекор од тоа да добие свој втор кошаркарски репрезентативец што ќе настапува во НБА лигата, по историскиот настап на Перо Антиќ. На прагот на најсилната кошаркарска сцена се наоѓа натурализираниот бек Ти-Џеј Шортс.
Шортс блесна на европската сцена со четири извонредни сезони, започнувајќи од ФИБА Еврокупот, преку Лигата на Шампионите и Еврокупот, сè до највисокото ниво – Евролигата. Со Париз, клубот со најмал буџет во натпреварувањето, успеа да се наметне како сериозен кандидат за МВП признание во регуларниот дел од сезоната, иако на крајот го доби признанието за најдобар играч во плеј-инот.
По успешната сезона, Шортс сигурно го напушта Париз. Иако беше посакуван од неколку европски велесили како Панатинаикос и Фенербахче, неговиот следен чекор ќе биде Мемфис во НБА. Таму повторно ќе работи со финскиот тренер Туомас Исало, со кого имаше успешна соработка и претходно.
