Македонија

Вицепремиерот Арбен Фетаи на средба со Курти, ексминистерот Азир Алиу останува во ВЛЕН

„Сметам дека излегувањето (н.з. од Владата) во овој момент, без јасен план, дава можност за индиректно рехабилитирање и ‘лечење’ на старите структури од ДУИ и нивните несмасни наративи, а тоа е чекор што јас не го делам, бидејќи верувам дека секој еден млад Албанец, интелектуалец, заслужува поразлична политичка опција“, напиша на Фејсбук поранешниот министер од редовите на Алијанса за Албанците, Азир Алиу

Поранешниот министер за информатичко општество и администрација од редовите на Алијанса за Албанците, Азир Алиу, денеска на Фејсбук објави дека останува во коалицијата ВЛЕН.

Алиу напиша оти смета дека Владата почнала пресметка со корупцијата и криминалот и го подигнала гласот против заробената држава на, како што вели, веќе познатите и корумпирани структури во ДУИ.

Верувам дека определбата за промени во општеството не се напушта при првата пречка, туку се гради со уште повеќе работа. Со голема почит кон претседателот на партијата и неговото право на политичка проценка, се чувствувам должен јавно да кажам дека ќе продолжам да бидам дел од процесот што го започнавме заедно во ВЛЕН и во оваа Влада! … Сметам дека излегувањето во овој момент, без јасен план, дава можност за индиректно рехабилитирање и ‘лечење’ на старите структури од ДУИ и нивните несмасни наративи, а тоа е чекор што јас не го делам, бидејќи верувам дека секој еден млад Албанец, интелектуалец, заслужува поразлична политичка опција“,напиша Алиу.

Вицепремиерот за добро владеење, пак, Арбен Фетаи, кој исто така доаѓа од Алијанса за Албанците, на Фејсбук објави фотографии од средба што денеска ја имал со косовскиот премиер Албин Курти пишувајќи дека идеалот за напредок и развој не познава граници.

На една од фотографиите се гледа и ексминистерот Азир Алиу.

„Утринава, заедно со неколку пријатели по идеал од Алијансата за Албанците, тргнавме кон Приштина, поминувајќи по автопатот ‘Арбен Џафери’, пат кој за нас не е само инфраструктура, туку симбол на нашата духовна и национална поврзаност. Таму во Приштина имавме братски разговор со нашиот пријател, Албин Курти. Она што денеска нè обединува, повеќе од кога било, е нашата заедничка визија и идеал за напредок и развој, идеал кој не познава граници, ниту пречки“,напиша Фетаи.

Инаку, пред два дена Арбен Таравари ја напушти Владата поднесувајќи си оставка од позицијата министер за здравство. Денеска во интервју за албанската телевизија МЦН тој појасни дека неговата Алијанса за Албанците ја напушти Владата и коалицијата ВЛЕН бидејќи не сакале да бидат само декор во власта.

Ние како Алијанса за Албанците не сме навикнати во Владата да бидеме само декорација. Затоа решивме да одиме во опозиција и да се вратиме кај граѓаните, да разговараме со нив, за да се подготвиме за локалните избори што треба да се одржат во октомври годинава. На пет месеци сме пред локалните избори и мислам дека партијата треба да се мобилизира бидејќи за нас е многу важно да извојуваме победа“,изјави Таравари.

Првиот вицепремиер, пак, Изет Меџити кој е еден од лидерите во коалицијата ВЛЕН, изјави дека Владата има стабилно мнозинство и по заминувањето на Арбен Таравари и дека во тек се преговори со пратеници од „Европскиот фронт“, кои се во опозиција, за нивно приклучување кон владејачкото мнозинство.

извор: 360stepeni.mk

Македонија

Стабилно време со магла до понеделник, дожд од вторник

До понеделник се очекува стабилно и претежно тивко време низ земјава, со појава на магла во утринските часови и зголемена облачност на некои места.

Утре, 18 декември, времето ќе биде променливо облачно со сончеви периоди, додека претпладне на одредени места ќе се појави магла. Ветарот ќе биде слаб и променлив.

Во Скопје се очекува слично време, со претежно тивко време и појава на магла во котлинските делови претпладне.

Стабилното време ќе се задржи до понеделник, а од вторник се најавуваат локални врнежи од дожд.

Македонија

Над 40 државни институции преминаа на електронско управување со документи

Повеќе од 40 институции во државата веќе го користат националниот Документ менаџмент систем (ДМС), што овозможува побрзи и поефикасни услуги за граѓаните, соопшти министерот за дигитална трансформација Стефан Андоновски во изјава за медиумите.

Според него, поврзувањето на институциите и општините преку единствен дигитален систем претставува суштинска реформа во функционирањето на државната администрација, со фокус на поедноставени и подостапни јавни услуги.

Андоновски информираше дека за само четири месеци е двојно зголемен бројот на институции кои користат електронска архива и електронски систем за управување со документи. Дополнително, преку државната платформа за интероперабилност, само во ноември биле реализирани 2,6 милиони трансакции, што претставува значителен раст во однос на просекот во текот на 2024 година.

Министерот посочи и дека за 20 проценти е зголемен бројот на институции и компании приклучени на платформата за интероперабилност, што директно придонесува за намалување на административните процедури и потребата граѓаните да доставуваат документи од една до друга институција.

„Овие резултати значат помалку хартија, помалку чекање и помалку простор за корупција. Дигиталната трансформација не ја третираме како ИТ-проект, туку како реформа во корист на граѓаните, со јасни и фер процедури“, истакна Андоновски.

Тој додаде дека целта е институциите да функционираат брзо, разбирливо и еднакво за сите, а Министерството за дигитална трансформација останува посветено принципот „граѓаните на прво место“ да стане стандард во работењето на државата преку конкретни и мерливи резултати.

Македонија

Собранието ги усвои клучните закони за проектот „Безбеден град“

Собранието во рамки на попладневниот дел на 76. седница без расправа ги донесе измените и дополнувањата на повеќе закони кои се дел од пакетот потребен за целосно функционирање на системот „Безбеден град“. Со 65 гласа „за“ и ниту еден „против“ или „воздржан“, пратениците усвоија измени на Законот за извршување на санкциите, Законот за полиција, Законот за возила и Законот за безбедност на сообраќајот на патиштата, сите по скратена постапка.

Пратеникот Бојан Стојановски од ВМРО-ДПМНЕ истакна дека законот е дел од шесте законски измени кои обезбедуваат имплементација на еден од најзначајните проекти во историјата на Македонија, кој започна пред неколку недели и практично ќе стартува од 1 февруари.

Законот за прекршоци, исто така дел од пакетот, воведува посебна постапка за прекршоци констатирани со технички средства и уреди за снимање, вклучително електронска достава преку текстуални пораки или е-пошта, 50% намалување на глобата при доброволно плаќање во рок од осум дена, како и автоматско суспендирање на возачката дозвола по акумулирање на три забрани во четири години. Пратеничката Моника Трајанова од ВМРО-ДПМНЕ објасни дека измените ќе го зголемат ефектот на превенцијата, ќе намалат административни трошоци и ќе ја зголемат ефикасноста на постапките.

Стојановски додаде дека законите овозможуваат одземање на возило на несовесни возачи, како и подобрување на процесот на издавање возачки дозволи, со зголемена транспарентност и контрола врз членовите на комисијата која ги доделува дозволите.

Во рамки на истата седница, пратениците го усвоија и Законот за концесии и јавно-приватно партнерство, исто така по скратена постапка, со што се овозможува поефикасно реализирање на инфраструктурни и други јавни проекти.