Малите навики што ја градат – или рушат – блискоста во љубовните односи
Блискоста во љубовните врски не се создава преку спектакуларни гестови, туку се гради и одржува преку секојдневните навики: начинот на кој го слушаме партнерот, начинот на кој реагираме, меѓусебната почит и уважувањето на личните граници.
Иако на прв поглед делуваат безначајно, токму овие мали, но постојани однесувања често се клучен фактор во нарушувањето на интимноста. Стручњаците предупредуваат дека навики кои изгледаат „нормални“ или безопасни, со текот на времето можат да предизвикаат емоционална оддалеченост помеѓу партнерите. Затоа, важно е навреме да се препознаат и коригираат тие „мали искри“ кои со време можат да прераснат во голем јаз, пишува порталот Кликс.
Кога емоциите се повлекуваат – а тишината станува ѕид
Емоционалното повлекување често се појавува кога едниот партнер се чувствува преоптоварен, неразбран или разочаран. Наместо отворено да ги изрази своите чувства, тој се затвора во себе, што води до површна комуникација. Таквото однесување го наведува другиот партнер да се чувствува отфрлено и осамено, дури и кога се физички заедно.
Кога избегнувањето на разговор за важни теми или молчењето стануваат секојдневие, меѓу партнерите се создава „емоционален ѕид“. Разградувањето на таквата оддалеченост бара искреност, емпатија и – подготвеност да се биде ранлив.
Критиката како бариера – кога добрата намера станува штетна
Критиката, доколку е добронамерна и насочена кон однесувањето, а не кон личноста, може да има позитивна улога во врската. Но, кога станува хронична и остро насочена, таа ја поткопува самодовербата и чувството на прифатеност.
Без разлика на намерата, честото критикување создава атмосфера на несигурност и напнатост. Наместо поврзување, партнерите стануваат одбранбени, се затвораат и постепено се губи емоционалната врска.
Стручњаците препорачуваат емоциите и потребите да се изразуваат без обвинувања, со јасна и мирна комуникација. Само така може да се зачува довербата, а со тоа и блискоста – темелот на секој здрав љубовен однос.
