Две до три јајца дневно – здрава навика или ризик? Еве што навистина му се случува на телото
Со години наназад се водат полемики околу тоа дали секојдневната консумација на јајца е здрава или штетна. Новите научни сознанија, сепак, сè повеќе ја потврдуваат нивната вредност како вистинска „суперхрана“. Јајцата не само што се хранливи и достапни, туку носат бројни здравствени придобивки – од подобрен вид, преку зајакнати коски, до поддршка за мозокот и црниот дроб.
Холинот – храна за мозокот
Една од најважните состојки што јајцата ја содржат е холинот – клучна хранлива материја за здравјето на мозокот. Овој нутриент е составен дел на фосфолипидите, кои овозможуваат добра комуникација меѓу мозочните клетки. Редовното внесување на две јајца дневно обезбедува доволно холин за да се поддржат когнитивните функции и меморијата. Недостатокот од холинот, пак, може да доведе до ментална замагленост и слабеење на меморијата.
Лутеин за остар вид
Кокошкините јајца се богат извор и на лутеин – антиоксиданс кој игра суштинска улога во одржување на здравјето на очите. Овој пигмент го штити окото од оштетување и го забавува природниот процес на слабеење на видот. Редовната консумација на јајца може значително да помогне во превенција од дегенеративни болести на очите, како што е макуларната дегенерација.
Витамин Д за коскена густина
Јајцата природно содржат витамин Д – важен сојузник во апсорпцијата на калциумот. Наместо непријатното рибино масло, јајцата се вкусна алтернатива за внес на овој витамин кој помага во изградбата и одржувањето на здрави коски и заби.
Б-комплексот – за кожа, коса и црн дроб
Во јајцата се присутни и витамини од Б-комплексот, особено Б12 и биотин, кои се значајни за здравјето на кожата и косата. Исто така, фосфолипидите што ги содржат јајцата му помагаат на црниот дроб поефикасно да ги елиминира токсините, поддржувајќи ја неговата функција.
Консумацијата на две до три јајца дневно може да биде одличен начин за поддршка на целокупното здравје, сè додека се балансира со разновидна исхрана и здрав животен стил. Заборавете ги старите митови – оваа едноставна храна носи моќни придобивки.
