Балкан

Жечо Станков: Бугарија ѝ обезбедува електрична енергија на Северна Македонија и Србија по сериозните дефекти

Министерот за енергетика на Бугарија, Жечо Станков, изјави дека енергетскиот систем на Југоисточна Европа бил ставен на сериозно искушение – точно три недели по големиот дефект што ги погоди Шпанија и Португалија. Според него, Бугарија со дела и со зборови покажала дека е гарант за сигурноста на енергетските мрежи не само во земјата, туку и во целиот регион. Таа моментално ѝ помага на Северна Македонија и на Србија поради дефектите во нивните енергетски системи, пишува btvnovinite.bg

„Во раните утрински часови во неделата, системот се соочи со големи предизвици поради високите напони, предизвикани од ниската потрошувачка и зголеменото количество реактивна енергија. Бугарија располага со 90% од своите компензациски капацитети и успеавме да ги контролираме сите процеси, со што им помогнавме и на нашите соседи“, објасни министерот Станков на вонреден брифинг.

Тој додаде дека Бугарија ќе продолжи да ѝ помага на Северна Македонија по големиот енергетски дефект, а веќе постои барање за повторно воспоставување напон и на други електропроводи од 110 киловолти, освен линијата „Беласица“.

„Денешниот дефект е доказ дека Бугарија мора да инвестира во компензациски капацитети, како и во изградба на нови хидроакумулациски централи (ПАВЕЦ)“, нагласи Станков.

Тој појасни дека обновливите извори на енергија не се причина за проблемот – виновник е т.н. паразитна реактивна енергија, која го зголемила напонот во електричната мрежа. Производствените и компензациските капацитети во Бугарија ја заштитиле националната електроенергетска мрежа, апсорбирајќи ја оваа реактивна енергија. ПАВЕЦ „Чаира“ исто така може да ја има таа функција. Министерот истакна дека ниту еден потрошувач во Бугарија не го почувствувал дефектот што се случи во Северна Македонија.

Станков додаде дека и Хрватска се соочува со проблеми во својот преносен систем, поради недостигот на компензациски капацитети што би го стабилизирале производството на електрична енергија.

Да потсетиме, утрово околу 05:00 часот, половина Северна Македонија остана без струја. Погодени беа најголемите градови во земјата, вклучително и голем дел од главниот град – Скопје.

Балкан

Пијан возач фатен со 200 км/ч

Припадници на Министерството за внатрешни работи на Србија денес околу 14 часот го запреа Д.В. (39) во Лозница, кој управуваше возило „суди“ со брзина од 200,8 километри на час на дел од патот Лозница – Шабац, каде што ограничувањето е 100 км/ч.

Со алкотестирање е утврдено дека возачот бил во тешка алкохолна интоксикација, со 1,41 промили алкохол во крвта.

Возачот веднаш бил исклучен од сообраќај и задржан во службените простории, а против него е поднесена прекршочна пријава за насилно возење и возење под дејство на алкохол.

Балкан

Вучиќ: Србија има гориво до 15 јануари

Српскиот претседател Александар Вучиќ увери дека Србија има обезбедено доволно керозин, мазут, дизел и бензин најмалку до 15 јануари, а можеби и до 25 јануари, обидувајќи се да ги смири граѓаните по информациите за проблеми во нафтената индустрија.

Иако државата веќе 70 дена функционира без увоз на нафта, Вучиќ истакна дека енергетскиот систем е стабилен и дека нема причина за паника пред претстојните празници. Тој сепак призна дека ситуацијата е комплицирана, особено поради статусот на Нафтната Индустрија Србија (НИС), за што Белград следната недела ќе испрати итни барања до американската канцеларија за контрола на странски средства (ОФАК) за добивање оперативна лиценца.

„Доволно керозин, мазут, дизел и бензин обезбедивме најмалку до 15 јануари, можеби и до 25 јануари. Никој не треба да се грижи, имаме безброј технички проблеми, но државата знае како да ги реши“, рече Вучиќ.

Претседателот потенцираше дека Србија нема да дозволи колапс на енергетскиот сектор и им се заблагодари на граѓаните за поддршката. „Ве уверувам дека ќе имате доволно од сè што е потребно за празниците. Ќе добивате навремени информации за секоја промена“, додаде тој.

Балкан

Тешка несреќа на Дурмитор: Турист загина по пад од жичара, жена тешко повредена

Трагичен инцидент се случи денеска на ски-центарот Савин Кук на Дурмитор, кога две лица – странски туристи – паднале од корпа на ски-лифт, при што едно лице го загуби животот, а друго се здоби со тешки повреди.

Несреќата се случила на жичара број два, во стрмниот втор дел од трасата што води кон Савин Кук. Според првичните информации, загинал маж, додека повредената жена е во свесна состојба и комуникативна.

На терен се ангажирани спасувачки и надлежни служби, кои вршат увид и ја утврдуваат причината за инцидентот. Првичните сознанија укажуваат на можен технички дефект во вториот дел од жичарата, по што корпата во која се наоѓале туристите започнала да се движи наназад.