Израелскиот премиер Бенјамин Нетанјаху изјави денес дека Израел ќе ја преземе целосната контрола врз територијата на Појасот Газа, во време на обновена и засилена воена офанзива врз палестинската енклава.
„Борбите се интензивни и напредуваме. Ќе ја преземеме контролата врз целата територија на Појасот Газа. Не отстапуваме. Но, за да успееме, мораме да делуваме така што никој нема да може да нѐ запре“, изјави Нетанјаху во видео порака објавена на неговиот официјален канал на Телеграм.
Премиерот истакна и дека Израел има обврска да спречи хуманитарна катастрофа во Газа, посочувајќи дека тоа е важно „од дипломатски причини“. Коментарот доаѓа по веста за ограничено обновување на хуманитарната помош за населението во Појасот Газа.
„Нашите пријатели ширум светот ни порачаа дека нема да можат да го поддржат продолжувањето на воената операција ако продолжат да се појавуваат слики на масовна глад и страдање“, додаде тој.
Изјавите на израелскиот премиер следуваат во услови на зголемени меѓународни критики поради влошувањето на хуманитарната состојба во Газа, каде што, според ОН, милиони луѓе се соочуваат со недостиг од основни средства за живот.
