Поранешниот американски претседател Џо Бајден (82) се соочува со агресивна форма на рак на простата, соопшти неговата канцеларија вчера, додавајќи дека и покрај сериозноста на болеста, таа може да се држи под контрола. Веста предизвика силни реакции во јавноста, главно исполнети со поддршка и желби за брзо закрепнување. Сепак, не изостанаа и критични прашања – како е можно агресивниот рак да не бил откриен додека Бајден ја извршуваше функцијата претседател?
Меѓу првите што го поставија тоа прашање беше и најстариот син на американскиот претседател Доналд Трамп – Доналд Трамп Помладиот. Неговата реакција на социјалните мрежи предизвика лавина критики.
Инаку, Доналд Трамп (американскиот претседател) излезе со воздржана и сочувствителна изјава:
„Меланија и јас сме натажени од веста за здравствената состојба на Џо Бајден. Им испраќаме најтопли желби на Џил и целото семејство и му посакуваме брзо и успешно закрепнување“, напиша тој на својата платформа Truth Social.
За разлика од својот татко, Трамп Помладиот излезе со контроверзен став на мрежата X, каде што праша:
„Сакам да знам – како доктор Џил Бајден пропушти рак во петта фаза со метастази? Или, можеби, станува збор за уште еден обид за прикривање?“
Овој коментар предизвика бурни реакции и остри критики. Многумина го обвинија за нечуствителност и политичка злоупотреба на една човечка трагедија.
„Човекот се бори со рак, а твојот изопачен одговор е да ја обвиниш неговата сопруга за прикривање? Тоа не е само изопачено – тоа е нечовечки“, стои во еден од коментарите.
Исто така, беше нагласено дека Џил Бајден не е доктор по медицина, туку има академски докторат по образование, и не може да биде одговорна за медицинската дијагностика на својот сопруг.
И покрај лавината критики, Трамп Помладиот подоцна објави нов пост на X во кој се согласува со објава што вели:
„Без оглед на политичките разлики – му посакуваме брзо закрепнување!“
