Доколку ја добие лиценцата за фреквенција, македонските граѓани до крајот на 2026 година веќе ќе можат да ги користат услугите на потенцијалниот трет мобилен оператор 4iG, а зголемената конкуренција ќе донесе и пониски цени, соопштија од групацијата.
Пал Заранди, директор за стратегии, мобилни и 5Г на 4iGизјави дека веќе неколку месеци работат на подготовки и на воспоставување почетни партнерства на пазарот.
„Кога ќе ја добиеме лиценцата, ќе преминеме на интензивни инвестиции и подготовки за комерцијално лансирање“, изјави Заранди.
Унгарската групација 4iG засега е лидер на пазарот во Албанија, а активно работи и во Црна Гора. Има приходи од 1,8 милијарди евра и над 10 милиони корисници. Главната предност на 4iG, вели Заранди, е тоа што не е само телекомуникациска, туку е и ИТ ориентирана компанија, па може да ги прошири услугите на македонскиот пазар.
„Ќе донесеме нова конкуренција што ќе го стимулира дигиталниот екосистем. Ќе воспоставиме напредна 5G мрежа со голем капацитет. Тоа ќе придонесе за поголема конкуренција на мобилниот пазар, но и во доменот на фиксниот интернет, бидејќи 5G веќе може да се користи и како алтернатива за домашен интернет. Наш фокус ќе биде мобилната телекомуникација, но имаме и други области во кои се надеваме дека ќе бидеме активни и ќе поттикнеме раст и иновација“, додава Заранди.
Компанијата „Оне Македонија Телекомуникации“, основана од унгарската групација 4iG веќе поднесе писмо со намери за влез на македонскиот пазар и очекува дека најдоцна до крајот на летото ќе ги добие потребните лиценци за фреквенција.
Прелиминарната фаза во која компаниите доставуваа писма за покажување интерес за трет оператор на пазарот на мрежна мобилна телефонија во Македонија заврши пред неколку дена, а зависно од тоа дали има пријавени и други компании, ќе се знае и дали ќе биде распишан тендер со јавно наддавање.
